ന്യൂഡല്‍ഹി: ഉക്രൈൻ വിഷയത്തിൽ ഇന്ത്യൻ പൗരൻമാരുടെ താൽപര്യങ്ങൾക്കൊപ്പമാണ് സർക്കാർ നിലകൊള്ളുന്നതെന്ന് വിദേശകാര്യമന്ത്രി എസ് ജയശങ്കർ. റഷ്യ-ഉക്രൈൻ സംഘർഷത്തിൽ ഇന്ത്യ ഏത് പക്ഷത്താണെന്ന ചോദ്യത്തിന് മറുപടി പറയുകയായിരുന്നു വിദേശകാര്യ മന്ത്രി. പാശ്ചാത്യ ശക്തികളുടെ നിയന്ത്രണങ്ങൾ ലംഘിച്ച് റഷ്യയിൽ നിന്ന് ഇന്ത്യ എണ്ണ വാങ്ങിയതിനെതിരെ യുഎസിന്‍റെയും യൂറോപ്യൻ രാജ്യങ്ങളുടെയും വിമർശനങ്ങളുടെ പശ്ചാത്തലത്തിലാണ് ജയശങ്കറിന്‍റെ പരാമർശം.
സമാധാന പ്രക്രിയയ്ക്ക് മുൻകൈ എടുക്കുമോ എന്ന ചോദ്യത്തിന് ജയശങ്കർ വ്യക്തമായ ഉത്തരം നൽകിയില്ല. ഈ വിഷയത്തിൽ തങ്ങളുടെ കാഴ്ചപ്പാടുകൾ പങ്കിടുന്ന രാജ്യങ്ങളിലൊന്നാണ് ഇന്ത്യയെന്നും അദ്ദേഹം പറഞ്ഞു. ഇന്ത്യയും പ്രധാനമന്ത്രി നരേന്ദ്ര മോദിയും സംഘർഷം അവസാനിപ്പിക്കുന്ന കാര്യത്തിൽ ലോകത്തിന്‍റെ, പ്രത്യേകിച്ച് വികസ്വര രാജ്യങ്ങളുടെ ശബ്ദമായി മാറിയിരിക്കുന്നു. ഭക്ഷ്യവസ്തുക്കൾ, ഇന്ധനം, രാസവളം, ഇന്ധന ക്ഷാമം എന്നിവയുടെ വിലക്കയറ്റത്തിന്‍റെ പശ്ചാത്തലത്തിൽ പ്രശ്നം എത്രയും വേഗം അവസാനിപ്പിക്കണമെന്നാണ് ലോകരാജ്യങ്ങള്‍ ആഗ്രഹിക്കുന്നതെന്ന് ജയശങ്കർ പറഞ്ഞു.
ഫെബ്രുവരിയിൽ സംഘർഷം ആരംഭിച്ചതിന് ശേഷം നിരവധി തവണ പ്രധാനമന്ത്രി നരേന്ദ്ര മോദി റഷ്യൻ പ്രസിഡന്‍റ് വ്ളാഡിമിർ പുടിനുമായും ഉക്രേനിയൻ പ്രസിഡന്‍റ് വോളോഡിമിർ സെലെൻസ്കിയുമായും സംസാരിച്ചിട്ടുണ്ട്. ഒക്ടോബർ നാലിന് സെലെൻസ്കിയുമായി നടത്തിയ ടെലിഫോൺ സംഭാഷണത്തിൽ സൈനിക പരിഹാരം സാധ്യമല്ലെന്നും ഏത് സമാധാന പ്രക്രിയയിലും മധ്യസ്ഥത വഹിക്കാൻ ഇന്ത്യ തയ്യാറാണെന്നും മോദി പറഞ്ഞിരുന്നു. സെപ്റ്റംബർ 16ന് ഉസ്ബെക്കിസ്ഥാനിൽ പുടിനുമായി നടത്തിയ കൂടിക്കാഴ്ചയിൽ മോദി ഇത് യുദ്ധത്തിന്റെ കാലഘട്ടമല്ലെന്ന് വ്യക്തമാക്കിയിരുന്നു.