മലപ്പുറം: മലപ്പുറത്ത് നിന്നുള്ള ഷാജി കാളിയത്തിനെ കെപിസിസി അംഗമാക്കാനുള്ള തീരുമാനം കോണ്‍ഗ്രസ് മരവിപ്പിച്ചു. ശശി തരൂരിന്റെ നാമനിർദ്ദേശ പത്രികയിൽ ഒപ്പിട്ട ജില്ലയിൽ നിന്നുള്ള ഏക ഭാരവാഹിയായിരുന്നു ഷാജി. മലപ്പുറത്ത് ശശി തരൂരിന് നൽകിയ സ്വീകരണത്തിലും ഷാജി സജീവമായിരുന്നു. ഷാജിയെ കെ.പി.സി.സി അംഗമായി നിയമിച്ചതിനെതിരെ പൊന്നാനി കോണ്‍ഗ്രസിൽ നേരത്തെ പ്രതിഷേധം ഉയർന്നിരുന്നു. ഇക്കാര്യങ്ങൾ പഠിക്കാൻ നിയോഗിച്ച സമിതിയുടെ നിർദേശ പ്രകാരമാണ് നടപടിയെന്നാണ് ഡി.സി.സി പ്രസിഡന്‍റിന്‍റെ വിശദീകരണം.
അതേസമയം ശശി തരൂർ ഇന്ന് കോട്ടയം സന്ദർശിക്കും. യൂത്ത് കോണ്‍ഗ്രസിന്‍റെ പ്രൗഢഗംഭീരമായ സമ്മേളനത്തിൽ അദ്ദേഹം പങ്കെടുക്കും. യൂത്ത് കോണ്‍ഗ്രസ് സമ്മേളനത്തെ കുറിച്ച് തനിക്ക് അറിയിപ്പൊന്നും ലഭിച്ചിട്ടില്ലെന്ന് ആവർത്തിച്ച് കോട്ടയം ഡിസിസി പ്രസിഡന്‍റ് നാട്ടകം സുരേഷ്. തരൂർ ഇന്ന് ജില്ല സന്ദർശിക്കുന്ന വിവരം അറിയിച്ചിരുന്നില്ല. ശശി തരൂരിന്റെ ഓഫീസിൽ നിന്നുള്ള ഫോൺ കോൾ ഒന്നും പറയാതെ കട്ട് ചെയ്തു. സംഘടനാപരമായ മാനദണ്ഡങ്ങൾ പാലിച്ചില്ലെന്നും അദ്ദേഹം പരാതിപ്പെട്ടു. ഇക്കാര്യം കെ.പി.സി.സി നേതൃത്വത്തെ അറിയിച്ചിട്ടുണ്ടെന്നും അദ്ദേഹം പറഞ്ഞു.