തിരുവനന്തപുരം: വഖഫ് ബോർഡ് നിയമനം പി.എസ്.സിക്ക് വിടില്ലെന്ന് സർക്കാർ നിയമസഭയിൽ. ഇതിനായി നിയമഭേദഗതി കൊണ്ടുവരുമെന്ന് മുഖ്യമന്ത്രി നിയമസഭയെ അറിയിച്ചു. മുസ്ലിം സമുദായ നേതാക്കളുടെ യോഗത്തിൽ നൽകിയ ഉറപ്പ് പാലിക്കുമെന്നും മുഖ്യമന്ത്രി പറഞ്ഞു. പി കെ കുഞ്ഞാലിക്കുട്ടിയുടെ സബ്മിഷന് മറുപടിയായാണ് ഇക്കാര്യം വ്യക്തമാക്കിയത്.
ഐ.യു.എം.എൽ അന്ന് ഉന്നയിച്ച പ്രധാന പ്രശ്നം നിലവിലുള്ള ജീവനക്കാർക്ക് ജോലി നഷ്ടപ്പെടുമെന്നതായിരുന്നു. താൽക്കാലിക ജീവനക്കാരെ സ്ഥിരപ്പെടുത്തുമെന്ന് വ്യക്തമാക്കിയാണ് നിയമസഭ പ്രമേയം പാസാക്കിയത്. എന്നാൽ കുറച്ച് കാലത്തിന് ശേഷം ലീഗ് അത് ഉന്നയിക്കുകയും അത് ഒരു പൊതു പ്രശ്നമായി മാറുകയും ചെയ്തു.
2016 ജൂലൈ 19ന് വഖഫ് ബോർഡ് യോഗം ചേർന്ന് ഒഴിവുള്ള തസ്തികകളിലേക്ക് പി.എസ്.സി വഴി നിയമനം നടത്താൻ തത്വത്തിൽ തീരുമാനമെടുത്തു. ഇതുമായി ബന്ധപ്പെട്ട് പുറപ്പെടുവിച്ച ഓർഡിനൻസിന് പകരമുള്ള ബില്‍ നിയമസഭ പാസാക്കി. വഖഫ് ബോർഡ് നിയമനം പി.എസ്.സിക്ക് വിടരുതെന്ന ആവശ്യം വിശദമായ സൂക്ഷ്മപരിശോധനയ്ക്കായി സബ്ജക്ട് കമ്മിറ്റിക്ക് വിട്ടപ്പോഴോ നിയമസഭയിലെ ചർച്ചകളിലോ ആരും ഉന്നയിച്ചിരുന്നില്ല എന്നതാണ് വസ്തുത. നിയമനിർമ്മാണത്തെ തുടർന്ന് മുസ്ലിം സമുദായ സംഘടനകൾ ചില ആശങ്കകൾ ഉന്നയിച്ചിരുന്നു.