അമ്പത് വർഷങ്ങൾക്ക് മുമ്പ്, അമേരിക്കൻ സൈന്യം തൻ്റെ ഗ്രാമത്തിൽ ബോംബുകൾ വർഷിച്ചപ്പോൾ ഒൻപതു വയസ്സുകാരിയായ ഒരു പെൺകുട്ടി കരഞ്ഞുകൊണ്ട് ഓടുന്ന ചിത്രം . നഗ്നയായി, ദേഹമാകെ പൊള്ളലേറ്റ്, ഭയത്താൽ വിറയ്ക്കുന്ന അവളുടെ ചിത്രം ലോകമനസ്സാക്ഷിയെ പിടിച്ചുകുലുക്കി. വിയറ്റ്നാം യുദ്ധത്തിന്റെ ഭീകരത ലോകത്തെ വിളിച്ചറിയിച്ചു. യുദ്ധം അവസാനിപ്പിക്കാൻ പ്രേരിപ്പിക്കുന്ന വിധത്തിൽ അമേരിക്കയെയും ലോകത്തെയും ചിന്തിപ്പിക്കുകയും ചെയ്തു ഈ ചിത്രം. ‘നാപാം പെണ്‍കുട്ടി’ എന്നറിയപ്പെടുന്ന അവരുടെ യഥാർഥ പേര് ഫാൻ തി കിം ഫുക്ക് എന്നാണ്.
യുദ്ധത്തിൽ മനസ്സിനും ശരീരത്തിനും പരിക്കേറ്റ കിം ഫുക്ക്, 50 വർഷങ്ങൾക്ക് ശേഷമാണ് ബോംബ് ആക്രമണത്തിന്റെ പൊള്ളലിന് ചികിത്സ പൂർത്തിയാക്കിയത്. 59-ാം വയസിലാണ് കിം ഫുക്ക് അവസാനമായി ത്വക്ക് ശസ്ത്രക്രിയയ്ക്ക് വിധേയയയായത്. 1972-ൽ കിം ഫുക്കിന് യുദ്ധത്തിനിടെ പൊള്ളലേറ്റു. ഒരു വർഷത്തെ ആശുപത്രി വാസത്തിനും 17 ശസ്ത്രക്രിയകൾക്കും ശേഷമാണ് കിമ്മിനെ ആശുപത്രി വിടുന്നത്. സാധാരണ ജീവിതത്തിലേക്ക് മടങ്ങാൻ അവൾക്ക് നിരവധി ചികിത്സകൾക്ക് വിധേയയാകേണ്ടിവന്നു. ഒൻപതാം വയസ്സിൽ ഗുരുതരമായി പൊള്ളലേറ്റ അവർ ഇതിനകം നിരവധി ചികിത്സകൾക്ക് വിധേയയായിരുന്നു.