ന്യൂഡല്‍ഹി: ജനപ്രതിനിധി സഭയിലെ നിലവിലെ അംഗബലം കണക്കിലെടുക്കുമ്പോൾ, രാഷ്ട്രപതി തിരഞ്ഞെടുപ്പിൽ ഭൂരിപക്ഷം നേടാൻ എൻഡിഎയ്ക്ക് 13,000 വോട്ടുമൂല്യം കുറവുണ്ട്.വൈ.എസ്.ആർ. കോൺഗ്രസും (43,000 വോട്ടുകൾ) ബിജു ജനതാദളും (31,000 വോട്ടുകൾ) ഈ കുറവ് നികത്തുമെന്ന പ്രതീക്ഷയിലാണ് പ്രതിപക്ഷത്തുളള കൂടുതൽ പ്രാദേശിക പാർട്ടികളുമായി എൻഡിഎ രഹസ്യ ധാരണയിൽ ഏർപ്പെട്ടിട്ടുള്ളത്. സ്ഥാനാർത്ഥിയുടെ വിജയം എളുപ്പമാക്കാനുള്ള ശ്രമങ്ങളാണ് ഇവർ നടത്തുന്നത്.
അടുത്ത മാസം 18ന് നടക്കാനിരിക്കുന്ന രാഷ്ട്രപതി തിരഞ്ഞെടുപ്പിൽ വിജയിക്കുമെന്ന ആത്മവിശ്വാസത്തിലാണ് എൻഡിഎ. എന്നിരുന്നാലും, സഖ്യത്തിലെ പാർട്ടി മാറ്റങ്ങൾ വോട്ട് മൂല്യത്തിൽ ഇടിവിന് കാരണമായി. 2017 ൽ എൻഡിഎയുടെ ഭാഗമായിരുന്ന ശിവസേനയും അകാലിദളും ഇത്തവണ തങ്ങളോടൊപ്പമില്ല. 2017ന് ശേഷം നടന്ന ഉപതിരഞ്ഞെടുപ്പുകളിൽ രാജസ്ഥാനിലെയും ഛത്തീസ്ഗഡിലെയും ഭൂരിപക്ഷം നഷ്ടപ്പെട്ടതും പോളിംഗ് ശതമാനത്തെ ബാധിക്കും. കഴിഞ്ഞ തവണ പിന്തുണച്ച ചന്ദ്രശേഖർ റാവുവിന്റെ ടിആർഎസ് ഇത്തവണ ബിജെപി വിരുദ്ധമാണ്. ബിഹാറിൽ നിതീഷ് കുമാറിന്റെ നിലപാടും എൻഡിഎ സഖ്യത്തിലെ അസ്വസ്ഥതകൾ കാരണം ചാഞ്ചാട്ടത്തിലാണ്. ഈ സാഹചര്യത്തിലാണ് എൻഡിഎയ്ക്ക് ഭൂരിപക്ഷത്തിന് 13,000 വോട്ടുമൂല്യം കണ്ടെത്തേണ്ടി വരുന്നത്.
വൈഎസ്ആർ കോൺഗ്രസ്‌ നേതാവ് ജഗൻ മോഹൻ റെഡ്ഡിയും ഒഡീഷ മുഖ്യമന്ത്രി നവീൻ പട്നായിക്കും കഴിഞ്ഞ മാസം പ്രധാനമന്ത്രിയുമായി കൂടിക്കാഴ്ച നടത്തിയിരുന്നു. മായാവതിയുടെ രഹസ്യ പിന്തുണയും ഉത്തർപ്രദേശിൽ നിന്ന് പ്രതീക്ഷിക്കുന്നു.