അയോഗ്യതാ നോട്ടീസിനെതിരെ വിമത ശിവസേന എംഎൽഎമാർ നൽകിയ ഹർജി സുപ്രീംകോടതി ഇന്ന് പരിഗണിക്കും. അജയ് ചൗധരിയെ ശിവസേന നിയമസഭാ കക്ഷി നേതാവായി നിയമിച്ചതിനെ വിമത നേതാക്കൾ ചോദ്യം ചെയ്യുന്നുണ്ട്. ഡെപ്യൂട്ടി സ്പീക്കർ നരഹരി സിർവാളിനെതിരായ അവിശ്വാസ പ്രമേയം തള്ളിയ വിഷയവും ഹർജിയിൽ ഉന്നയിക്കുന്നുണ്ട്. കോടതിയുടെ അവധിക്കാല ബെഞ്ചാണ് ഹർജികൾ പരിഗണിക്കുന്നത്.
പാർട്ടിക്കെതിരെ കലാപം നടത്തുകയും സർക്കാരിനെ തകർച്ചയുടെ വക്കിലെത്തിക്കുകയും ചെയ്ത 16 വിമത എംഎൽഎമാരെ അയോഗ്യരാക്കണമെന്ന് ആവശ്യപ്പെട്ട് ശിവസേന ഡെപ്യൂട്ടി സ്പീക്കർക്ക് ഹർജി നൽകിയിരുന്നു. ഇന്ന് വൈകുന്നേരത്തോടെ രേഖാമൂലം മറുപടി നൽകണമെന്ന് ആവശ്യപ്പെട്ട് ഡെപ്യൂട്ടി സ്പീക്കറുടെ ഓഫീസ് എംഎൽഎമാർക്ക് നോട്ടീസ് അയച്ചിരുന്നു. ചീഫ് വിപ്പ് വിളിച്ച യോഗത്തിൽ പങ്കെടുക്കാത്തതിനാണ് 16 വിമത എംഎൽഎമാർക്കെതിരെ ഡെപ്യൂട്ടി സ്പീക്കർ അയോഗ്യതാ നോട്ടീസ് അയച്ചത്.
അതേസമയം, ഷിൻഡെയും മഹാരാഷ്ട്ര മുഖ്യമന്ത്രി ഉദ്ധവ് താക്കറെയും തമ്മിലുള്ള കടുത്ത അധികാര വടംവലിക്കിടെ, ഒരു മന്ത്രി കൂടി ഞായറാഴ്ച സേനാ ക്യാമ്പ് വിട്ട് വിമത നേതാക്കൾക്കൊപ്പം ചേർന്നു. ഉദ്ധവ് താക്കറെയുടെ ടീം വിടുന്ന ഒമ്പതാമത്തെ മന്ത്രിയാണ് ഉദയ് സാമന്ത്. അതേസമയം വിമതർക്കെതിരായ നിലപാട് കടുപ്പിച്ച്, വിമത ക്യാമ്പിലെ മന്ത്രിമാരുടെ വകുപ്പുകൾ നീക്കം ചെയ്യുന്ന കാര്യം ശിവസേന നേതൃത്വം പരിഗണിക്കുന്നുണ്ട്. നഗരവികസന മന്ത്രാലയത്തിൻറെ തലവനായ ഷിൻഡെ, ജലവിതരണ, ശുചിത്വ മന്ത്രി ഗുലാബ്രാവു പാട്ടീൽ, കൃഷിമന്ത്രി ദാദാ ഭുസെ, സംസ്ഥാന മന്ത്രിമാരായ സംഭുരാജെ ദേശായി, അബ്ദുൾ സത്താർ എന്നിവർക്ക് വകുപ്പുകൾ നഷ്ടമാകുമെന്നാണ് റിപ്പോർട്ട്.