ആലപ്പുഴ: സോളാര്‍ കേസ് പ്രതി സരിതാ എസ് നായര്‍ക്കെതിരെ ഡി ജി പി അനില്‍ കാന്തിന് പരാതി നൽകി. സരിത എസ് നായരെ കാണാനില്ലെന്ന് പൊലീസ് കോടതിയെ അറിയിച്ചിട്ടുണ്ടെന്നും എന്നാൽ അതേ സരിത എസ് നായർ ദിവസവും വാർത്താസമ്മേളനം നടത്തുന്നുണ്ടെന്നും അമ്പലപ്പുഴ സ്വദേശി നാരായണൻ നമ്പൂതിരി ഡിജിപിക്ക് നൽകിയ പരാതിയിൽ പറയുന്നു.
വാറണ്ട് പുറപ്പെടുവിക്കുന്ന കേസുകളിൽ പോലും സരിതയെ അറസ്റ്റ് ചെയ്ത് ഹാജരാക്കുന്നില്ലെന്നും പരാതിയിൽ ആരോപിക്കുന്നു. താനും മറ്റുള്ളവരും നൽകിയ കേസിൽ ഹാജരാകാത്ത സരിതയെ കാണാനില്ലെന്നാണ് കോടതിയിൽ മറുപടി പറയുന്നതെന്നും നാരായണൻ നമ്പൂതിരി പറഞ്ഞു.
13 ല്‍ അധികം കേസില്‍ വാറണ്ടുള്ളയാളാണ് ദിവസേന പത്ര സമ്മേളനം നടത്തുകയും, പൊലീസ് സ്റ്റേഷനുകളില്‍ എത്തി പരാതിയും മൊഴിയും ഉള്‍പ്പടെ നല്‍കുന്നത് എന്നും നാരായണന്‍ നമ്പൂതിരി ചൂണ്ടിക്കാട്ടി. ഇത് പൊലീസും സരിത എസ് നായരും തമ്മിലുള്ള ഒത്തുകളിയാണ് എന്നും നാരായണന്‍ നമ്പൂതിരി ആരോപിച്ചു.