ചൈന: വിവിധ ബാങ്ക് ശാഖകളിൽ നടന്ന കോടികളുടെ തട്ടിപ്പിനെതിരെ വൻ ജനരോഷത്തിന്‍റെ പശ്ചാത്തലത്തിൽ നിക്ഷേപകരുടെ പണം തിരികെ നൽകുമെന്ന് ചൈനയിലെ ഹെനാൻ പ്രവിശ്യ പ്രഖ്യാപിച്ചു. അൻഹുയി പ്രവിശ്യയിലും സമാനമായ തട്ടിപ്പ് നടന്നിട്ടുണ്ടെന്നും പണം ഇവിടെയും തിരികെ നൽകുമെന്നും അധികൃതർ പറഞ്ഞു. ജൂലൈ 15 മുതൽ ഗഡുക്കളായി പണം നൽകും.
ഹെനാൻ തലസ്ഥാനമായ ഷെൻഷൗവിലെ ചൈനീസ് സെൻട്രൽ ബാങ്കിന്‍റെ (പീപ്പിൾസ് ബാങ്ക് ഓഫ് ചൈന) പ്രവിശ്യാ ശാഖയ്ക്ക് മുന്നിൽ ഞായറാഴ്ച ആയിരത്തോളം ആളുകൾ പ്രതിഷേധിച്ചു. സാമ്പത്തിക പ്രതിസന്ധിയിലായ ഹെനാൻ പ്രവിശ്യയിലെ നാല് ബാങ്കുകൾ ഏപ്രിൽ പകുതി മുതൽ പണം പിൻവലിക്കുന്നത് മരവിപ്പിച്ചിരിക്കുകയാണ്. മരവിപ്പിച്ച പണം 1.5 ബില്യൺ ഡോളർ വരെയാകാമെന്ന് ചൈനീസ് മാധ്യമങ്ങൾ റിപ്പോർട്ട് ചെയ്യുന്നു.
സമാധാനപരമായ പ്രതിഷേധക്കാരെ സുരക്ഷാ ഉദ്യോഗസ്ഥർ മർദ്ദിക്കുകയും വലിച്ചിഴയ്ക്കുകയും സംഭവസ്ഥലത്ത് നിന്ന് മാറ്റുകയും ചെയ്യുന്ന വീഡിയോ പുറത്തുവന്നിട്ടുണ്ട്. പലരും അവരുടെ ജീവിതത്തിലെ സമ്പാദ്യം മുഴുവൻ ഈ ബാങ്കുകളിൽ നിക്ഷേപിക്കാറുണ്ടായിരുന്നു. ഈ ബാങ്കുകളിൽ അക്കൗണ്ടുള്ള പല കമ്പനികൾക്കും അവരുടെ ജീവനക്കാർക്ക് ശമ്പളം നൽകാൻ പോലും കഴിഞ്ഞിട്ടില്ല. ഇവിടത്തെ നിക്ഷേപകർക്ക് ചെറിയ തുകകൾ പിൻവലിക്കാനോ പണമിടപാടുകൾ നടത്താനോ കഴിഞ്ഞിട്ടില്ല.