ന്യൂഡല്‍ഹി: പാരിസ്ഥിതിക പ്രശ്നങ്ങൾക്ക് ജൈവകൃഷിയാണ് പരിഹാരമെന്ന് പ്രധാനമന്ത്രി നരേന്ദ്ര മോദി. ലോക പരിസ്ഥിതി ദിനത്തിൽ ഇഷ ഫൗണ്ടേഷൻ സംഘടിപ്പിച്ച ‘സേവ് സോയിൽ’ പരിപാടിയിൽ സംസാരിക്കുകയായിരുന്നു അദ്ദേഹം. ഗംഗാനദിയുടെ തീരത്തുള്ള ഗ്രാമങ്ങളിൽ ജൈവകൃഷി പ്രോത്സാഹിപ്പിക്കുന്നതിന് ഈ വർഷത്തെ കേന്ദ്ര ബജറ്റിൽ ഫണ്ട് വകയിരുത്തിയിട്ടുണ്ട്. പദ്ധതി നടപ്പിലാകുന്നതോടെ കൃഷിഭൂമി രാസവിമുക്തമാകും. ഗംഗ ജൈവകൃഷിയുടെ ഒരു പ്രധാന ഇടനാഴിയായി മാറും. 2030 ഓടെ 26 ദശലക്ഷം ഹെക്ടർ ഫലഭൂയിഷ്ഠമായ ഭൂമി വീണ്ടെടുക്കുകയാണ് ലക്ഷ്യമെന്നും പ്രധാനമന്ത്രി കൂട്ടിച്ചേർത്തു.
കഴിഞ്ഞ എട്ട് വർഷത്തിനിടെ ഇന്ത്യയിൽ നടപ്പാക്കിയ എല്ലാ പദ്ധതികളും പരിസ്ഥിതി സംരക്ഷണത്തിന് ഊന്നൽ നൽകി. മണ്ണ് രാസപരമായി മരവിപ്പിക്കുക, സൂക്ഷ്മാണുക്കളുടെ സംരക്ഷണം, ജലലഭ്യത വർദ്ധിപ്പിച്ചുകൊണ്ട് മണ്ണിലെ ഈർപ്പം നിലനിർത്തുക, ഭൂഗർഭ ജലത്തിന്റെ അഭാവം മൂലം മണ്ണിനുണ്ടാകുന്ന കേടുപാടുകൾ പരിഹരിക്കുക, തുടർച്ചയായി മണ്ണൊലിപ്പ് തടയുക എന്നിങ്ങനെ അഞ്ച് കാര്യങ്ങളിലാണ് സർക്കാർ ശ്രദ്ധ കേന്ദ്രീകരിക്കുന്നതെന്ന് പ്രധാനമന്ത്രി പറഞ്ഞു.
ഇതിനായി കാർഷിക മേഖലയിലും ശ്രമങ്ങൾ നടക്കുന്നുണ്ട്. മണ്ണിന്റെ അപര്യാപ്തത പരിഹരിക്കുന്നതിൻ കർഷകർക്ക് സോയിൽ ഹെൽത്ത് കാർഡുകൾ നൽകുന്നതിനുള്ള നടപടികൾ ആരംഭിച്ചിട്ടുണ്ട്. നദീതടങ്ങളിൽ വൃക്ഷത്തൈകൾ നട്ടുപിടിപ്പിച്ചാൽ വനവിസ്തൃതി 7400 ചതുരശ്ര കിലോമീറ്റർ വർദ്ധിക്കും. കഴിഞ്ഞ എട്ട് വർഷത്തിനിടെ രാജ്യത്തെ വനവിസ്തൃതി 20,000 ചതുരശ്ര കിലോമീറ്റർ വർദ്ധിച്ചു. ഇത് വന്യ ജീവികളുടെ എണ്ണം വർദ്ധിപ്പിച്ചുവെന്നും മോദി പറഞ്ഞു.