ഭുവനേശ്വർ: ആണവായുധങ്ങൾ വഹിക്കാൻ ശേഷിയുള്ള ദീർഘദൂര മിസൈൽ അഗ്നി-4 വീണ്ടും വിജയകരമായി പരീക്ഷിച്ചു. ഒഡീഷ തീരത്ത് അബ്ദുൾ കലാം ദ്വീപിലെ ഇൻറഗ്രേറ്റഡ് ടെസ്റ്റ് റേഞ്ചിൽ നിന്നായിരുന്നു വിക്ഷേപണം. സ്ട്രാറ്റജിക് ഫോഴ്സസ് കമാൻഡിൻറെ നേതൃത്വത്തിലുള്ള പതിവ് അഭ്യാസത്തിൻറെ ഭാഗമായി നടത്തിയ പരീക്ഷണം പൂർണ വിജയമായിരുന്നുവെന്നും പ്രതിരോധ മന്ത്രാലയം അറിയിച്ചു.
അഗ്നി-4 രണ്ട് ഘട്ടങ്ങളായുള്ള ഉപരിതല ബാലിസ്റ്റിക് മിസൈലാണ്. 20 മീറ്റർ നീളമുള്ള മിസൈലിന് 17 ടണ്‍ ഭാരമുണ്ട്. 4,000 കിലോമീറ്റർ ദൂരപരിധിയിൽ ഒരു ടൺ ആണവായുധങ്ങൾ വഹിക്കാൻ ശേഷിയുള്ളതാണ് മിസൈൽ. ഇതിനകം തന്നെ സൈന്യത്തിൻറെ ഭാഗമായ അഗ്നി-4 പാകിസ്ഥാനെ ലക്ഷ്യമിട്ടുള്ളതാണ്.
കഴിഞ്ഞ വർഷം ഇന്ത്യ അഗ്നി പ്രൈം ബാലിസ്റ്റിക് മിസൈൽ പരീക്ഷിച്ചിരുന്നു. ആണവായുധങ്ങൾ വഹിക്കാൻ കഴിവുള്ള അഗ്നി പ്രധാന സംയോജിത വസ്തുക്കൾ കൊണ്ടാണ് നിർമ്മിച്ചിരിക്കുന്നത്. 1000-2000 കിലോമീറ്റർ ദൂരപരിധിയുള്ള മിസൈലാണ് അഗ്നി പ്രൈം. ഡോ എപിജെ അബ്ദുൾ കലാം ദ്വീപിലെ പരീക്ഷണ കേന്ദ്രത്തിൽ നിന്നാണ് മിസൈൽ പരീക്ഷിച്ചത്.