കോഴിക്കോട്: ഭരണഘടനയ്ക്കെതിരായ മന്ത്രി സജി ചെറിയാന്‍റെ പ്രസംഗം ഗുരുതരമായ സത്യപ്രതിജ്ഞാ ലംഘനമാണെന്നും അദ്ദേഹത്തെ മന്ത്രിസഭയിൽ നിന്ന് പുറത്താക്കാൻ മുഖ്യമന്ത്രി തയ്യാറാകണമെന്നും ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ ആവശ്യപ്പെട്ടു. ഇന്ത്യൻ ഭരണഘടന ചൂഷണത്തിന് അവസരമൊരുക്കുന്നുവെന്ന് പറഞ്ഞ ഒരാൾക്ക് ഒരു നിമിഷം പോലും മന്ത്രിയായി തുടരാൻ അവകാശമില്ലെന്നും അദ്ദേഹം പ്രസ്താവനയിൽ പറഞ്ഞു.
ഭരണഘടനയിൽ നിന്ന് സത്യപ്രതിജ്ഞ ചെയ്ത വ്യക്തിയാണ് സജി ചെറിയാൻ. ഭരണഘടനയെ സംരക്ഷിക്കാനുള്ള ഉത്തരവാദിത്തം മുഖ്യമന്ത്രിക്കാണ്. ഇന്ത്യൻ ഭരണഘടനയോടുള്ള കമ്യൂണിസ്റ്റുകാരുടെ അനാദരവ് തുറന്നുകാട്ടുന്നതാണ് സജി ചെറിയാന്‍റെ വാക്കുകൾ. താൻ ഒരു കമ്യൂണിസ്റ്റുകാരൻ മാത്രമല്ല, കേരളത്തിന്‍റെ മുഖ്യമന്ത്രി കൂടിയാണെന്ന് പിണറായി വിജയൻ മനസ്സിലാക്കണം.
ജനങ്ങളെ കൊള്ളയടിക്കാനാണ് ഇന്ത്യൻ ഭരണഘടന എഴുതിയതെന്നും മന്ത്രി പറഞ്ഞു. ഇത് അങ്ങേയറ്റം വിവരമില്ലാത്തതും അശ്ലീലവുമാണെന്ന് കെ സുരേന്ദ്രൻ പറഞ്ഞു. തൊഴിലാളികളെ ചൂഷണം ചെയ്യാൻ ഭരണഘടന സഹായിക്കുമെന്നും ഭരണഘടന തൊഴിലാളികൾക്ക് സംരക്ഷണം നൽകുന്നില്ലെന്നും അദ്ദേഹം പറയുന്നു.