ചെന്നൈ: ഫെഡറേഷൻ ഇന്‍റർനാഷണൽ ഡെസ് എചെക്സിന്റെ ചെസ്സ് ഒളിമ്പ്യാഡിന്‍റെ 44-ാമത് പതിപ്പിന് ചെന്നൈ ആതിഥേയത്വം വഹിക്കും. ചെസ്സ് ഒളിമ്പ്യാഡുമായി ബന്ധപ്പെട്ട് നഗരം പല തരത്തിൽ തയ്യാറെടുക്കുകയാണ്. ഇന്ത്യയുടെ ചെസ്സ് തലസ്ഥാനമായ ചെന്നൈയിലെ നേപ്പിയർ പാലത്തിന്‍റെ നവീകരണം ഇപ്പോൾ ശ്രദ്ധ നേടുകയാണ്. പാലം ഒരു ചെസ്സ് ബോർഡ് പോലെ പെയിന്‍റ് ചെയ്തിരിക്കുന്നു. ഇതൊരു മഹത്തായ കലാസൃഷ്ടിയാണെന്നാണ് ജനങ്ങളുടെ അഭിപ്രായം.
ഇത് കാണാനും പാലത്തിലൂടെ യാത്ര ചെയ്യാനും നിരവധി ആളുകൾ എത്താറുണ്ട്. തമിഴ്നാട് സർക്കാരിന്റെ പരിസ്ഥിതി, കാലാവസ്ഥാ വ്യതിയാനം, വനം അഡീഷണൽ ചീഫ് സെക്രട്ടറി സുപ്രിയ സാഹു, കറുപ്പിലും വെളുപ്പിലും വരച്ച ‘ചെസ്സ്ബോർഡ്’ പാലത്തിന്‍റെ വീഡിയോ സോഷ്യൽ മീഡിയയിൽ പങ്കുവെച്ചു. “ഇന്ത്യയുടെ ചെസ്സ് തലസ്ഥാനമായ ചെന്നൈ 2022 ലെ ചെസ്സ് ഒളിമ്പ്യാഡിന് ആതിഥേയത്വം വഹിക്കാൻ ഒരുങ്ങുകയാണ്. ഐക്കണിക് നേപ്പിയർ ബ്രിഡ്ജ് ഒരു ചെസ്സ് ബോർഡ് പോലെ അലങ്കരിച്ചിരിക്കുന്നു, “അദ്ദേഹം ട്വീറ്റ് ചെയ്തു. ചെസ്സ് ഒളിമ്പ്യാഡിന്‍റെ ഔദ്യോഗിക ടീസറും സൂപ്പർസ്റ്റാർ രജനീകാന്ത് ട്വിറ്ററിൽ പങ്കുവെച്ചിട്ടുണ്ട്. സംഗീത സംവിധായകൻ എ ആർ റഹ്മാനാണ് ടീസറിന് സംഗീതം നൽകിയിരിക്കുന്നത്.
ചെസ്സ്ബോർഡ് പോലെ തോന്നിക്കുന്ന പാലത്തിന്‍റെ വീഡിയോയും സോഷ്യൽ മീഡിയയിൽ വൈറലായിട്ടുണ്ട്. പരിപാടി വൻ വിജയമാക്കാൻ വിപുലമായ പദ്ധതികളാണ് തമിഴ്നാട് സർക്കാർ തയ്യാറാക്കിയിരിക്കുന്നത്. പാലത്തിലെ ചെസ്സ്ബോർഡിന്‍റെ ടീസറും പെയിന്‍റിംഗും എല്ലാം ലോകമെമ്പാടുമുള്ള ആളുകളെ ആകർഷിക്കാനുള്ള ശ്രമത്തിന്‍റെ ഭാഗമാണ്. 100 വർഷത്തിനിടെ ഇതാദ്യമായാണ് ഇന്ത്യ ചെസ്സ് ഒളിമ്പ്യാഡിന് ആതിഥേയത്വം വഹിക്കുന്നത്.