കർണാടകയിൽ തനിക്ക് നേരെയുണ്ടായ മഷി ആക്രമണത്തിൽ പ്രതികരണവുമായി കർഷക സമര നേതാവ് രാകേഷ് ടിക്കായത്ത്. അത് ആസൂത്രിതമായ ഗൂഡാലോചനയായിരുന്നുവെന്നും ഈ സർക്കാർ തന്നെ കൊല്ലാൻ ശ്രമിക്കുകയാണെന്ന് ഭാരതീയ കിസാൻ യൂണിയൻ (ബികെയു) ദേശീയ വക്താവ് രാകേഷ് ടിക്കായത്ത് ആരോപിച്ചു. മീററ്റ് ജില്ലയിലെ ജംഗേതി ഗ്രാമത്തിലെ ധർമേശ്വരി ഫാമിൽ ബികെയു അവലോകന യോഗത്തിൽ സംസാരിക്കുകയായിരുന്നു ടിക്കായത്ത്.
ഈ സർക്കാർ എന്നെ കൊല്ലാൻ ആഗ്രഹിക്കുന്നു. കർണാടകയിലും ഡൽഹിയിലും എനിക്കെതിരെ നടന്ന ആക്രമണങ്ങൾ ഇതിന് മതിയായ തെളിവാണ്. ടിക്കായത്ത് കുടുംബത്തെയും സംഘടനയെയും (യൂണിയൻ) നശിപ്പിക്കാനും അവർ ആഗ്രഹിക്കുന്നു. പക്ഷേ, അതൊരിക്കലും സംഭവിക്കില്ല,” അദ്ദേഹം പറഞ്ഞു. കഴിഞ്ഞ ഡിസംബറിൽ ഹെലികോപ്റ്റർ അപകടത്തിൽ മരിച്ച ജനറൽ ബിപിൻ റാവത്തിന് ആദരാഞ്ജലികൾ അർപ്പിക്കാൻ ഡൽഹിയിലെ വീട്ടിൽ പോയ തന്നെ കൊല്ലാൻ ഗൂഡാലോചന നടന്നുവെന്നും ടിക്കായത്ത് ആരോപിച്ചു. വിധ്വംസക രാഷ്ട്രീയത്തിലൂടെ കർഷക യൂണിയനെ തകർക്കാനാണ് സർക്കാർ ശ്രമിക്കുന്നത്. അതിനാൽ, നമ്മുടെ അഭിപ്രായവ്യത്യാസങ്ങൾ മാറ്റിവച്ച് ഒരുമിച്ച് മുന്നോട്ട് പോകണം, “അദ്ദേഹം പറഞ്ഞു.
ടിക്കായത്ത് കുടുംബം എല്ലായ്പ്പോഴും കർഷകരുടെ ശബ്ദം ശക്തമായി ഉയർത്തിയിട്ടുണ്ട്. അത് തുടരും. ബാബ മഹേന്ദ്ര സിംഗ് ടിക്കായത്തിന് ശേഷം നരേഷ് ടിക്കായത്തും കർഷകർക്കായി ജീവിതം സമർപ്പിച്ചിരുന്നു. ടിക്കായത്ത് കുടുംബം സമ്മർദ്ദത്തിന് വഴങ്ങില്ല. മഹാത്മാഗാന്ധിയെ ഗൂഡാലോചനക്കാർ വധിച്ചതുപോലെ. രാജ്യത്തിനും കർഷകർക്കും വേണ്ടി സംസാരിക്കുന്ന ഏതൊരാളെയും ഗൂഡാലോചനക്കാർ ലക്ഷ്യം വയ്ക്കുകയാണെന്നും അദ്ദേഹം പറഞ്ഞു. തിരഞ്ഞെടുപ്പിന് മുമ്പ് ഉത്തർപ്രദേശ് സർക്കാർ ജലസേചനത്തിന് സൗജന്യ വൈദ്യുതി വാഗ്ദാനം ചെയ്തിരുന്നു. എന്നാൽ ഇപ്പോൾ അവർ കുഴൽക്കിണറുകളിൽ മീറ്റർ സ്ഥാപിച്ച് കർഷകരെ ഉപദ്രവിക്കുകയാണെന്നും ഇത് വച്ചുപൊറുപ്പിക്കില്ലെന്നും അദ്ദേഹം കൂട്ടിച്ചേർത്തു.