തിരുവനന്തപുരം: റെക്കോർഡ് വിൽപ്പനയുമായി ഓണം ബമ്പർ ലോട്ടറി ടിക്കറ്റുകൾ. ഇതുവരെ 10.5 ലക്ഷം ടിക്കറ്റുകളാണ് അച്ചടിച്ച് വിതരണം ചെയ്തത്. 10 ലക്ഷം ടിക്കറ്റുകൾ കൂടി ഈ ആഴ്ച അവസാനം വിതരണം ചെയ്യും. ടിക്കറ്റിന്‍റെ വില സമ്മാനത്തുക 25 കോടി രൂപയുമാണ്. ടിക്കറ്റ് നിരക്ക് 500 രൂപയായി ഉയർന്നെങ്കിലും ജനങ്ങളിൽ നിന്ന് മികച്ച പ്രതികരണമാണ് ലഭിച്ചതെന്ന് ലോട്ടറി ഡയറക്ടറേറ്റ് അധികൃതർ പറഞ്ഞു.
ആദ്യഘട്ടത്തിൽ 30 ലക്ഷം ടിക്കറ്റുകളാണ് അച്ചടിക്കാൻ ഉദ്ദേശിക്കുന്നത്. കഴിഞ്ഞ തവണ ഓണം ബമ്പറിന്‍റെ 54 ലക്ഷം ടിക്കറ്റുകളാണ് വിറ്റഴിഞ്ഞത്. സുരക്ഷാ കാരണങ്ങളാൽ ഫ്ലൂറസന്‍റ് മഷി ഉപയോഗിച്ചാണ് ഓണം ബമ്പർ പ്രിന്റ് ചെയ്യുന്നത്. അച്ചടി സി-ആപ്റ്റിലാണ്. കേരളത്തിൽ ആദ്യമായാണ് ഒരു ലോട്ടറിയിൽ ഫ്ലൂറസെന്‍റ് മഷി ഉപയോഗിക്കുന്നത്. അച്ചടിച്ച ടിക്കറ്റുകൾ രണ്ട് ദിവസത്തെ ഇടവേളകളിൽ വിതരണം ചെയ്യും. ഫ്ലൂറസന്‍റ് നിറത്തിൽ അടിക്കുന്നതിനാൽ ടിക്കറ്റ് ഉണങ്ങാൻ സമയമെടുക്കുന്നതിനാലാണ് ഇടവേള.
ടിക്കറ്റ് പ്രിന്റ് ചെയ്ത ശേഷം യന്ത്രങ്ങളുടെ സഹായത്തോടെ ഫ്ലൂറസെന്‍റ് മഷി പ്രയോഗിക്കുന്നു. ഓണം ബംപറിന്റെ രണ്ടാം സമ്മാനം അഞ്ചു കോടി രൂപയും മൂന്നാം സമ്മാനം 10 പരമ്പരകളിലായി ഓരോ കോടി രൂപ വീതവുമാണ്. നാലാം സമ്മാനം ഒരു ലക്ഷംരൂപ വീതം 90 പേർക്ക്. അഞ്ചാം സമ്മാനം 5000 രൂപ വീതം 72,000 പേർക്ക്. ഇതിനു പുറമേ 3000 രൂപയുടെ 48,600 സമ്മാനങ്ങളും 2000 രൂപയുടെ 66,600 സമ്മാനങ്ങളും 1000 രൂപയുടെ 2,10,600 സമ്മാനങ്ങളും നൽകും. ആകെ 126 കോടിയുടെ സമ്മാനങ്ങളാണ് നൽകുക.