കാലടി: വിവാദ അസിസ്റ്റന്‍റ് പ്രൊഫസർ നിയമനങ്ങൾ ഉൾപ്പെടെ സ്ഥിരപ്പെടുത്തുന്നതിന് മുന്നോടിയായി സംസ്കൃത സർവകലാശാലയിൽ 15 ഉദ്യോഗാർത്ഥികളുടെ പ്രൊബേഷൻ പ്രഖ്യാപിച്ച് ഉത്തരവിറക്കി. സംസ്കൃതത്തിന്‍റെ പൊതുവിഭാഗത്തിൽ സ്ക്രീനിംഗ് കമ്മിറ്റി തള്ളിയവരുടെ പേരുകൾ പട്ടികയിൽ ഉൾപ്പെടുത്തിയതോടെയാണ് വിവാദങ്ങൾക്ക് തുടക്കമായത്. മലയാളം വിഭാഗത്തിൽ പ്രൊബേഷൻ ലഭിച്ചവരിൽ സ്പീക്കർ എം ബി രാജേഷിന്‍റെ ഭാര്യ ഡോ ആർ നിനിതയും ഉൾപ്പെടുന്നു. അധ്യാപക നിയമനവുമായി ബന്ധപ്പെട്ട് ഉദ്യോഗാർത്ഥികളുടെ ഹർജികൾ ഹൈക്കോടതിയുടെ പരിഗണനയിലിരിക്കെയാണ് സർവകലാശാലയുടെ നടപടി.
സംസ്കൃതത്തിന്‍റെ പൊതുവിഭാഗത്തിൽ മൂന്ന് സ്ഥാനാർത്ഥികളെ തിരഞ്ഞെടുത്തതിലെ പൊരുത്തക്കേടുകൾ ചൂണ്ടിക്കാട്ടി സിൻഡിക്കേറ്റ്, സ്ക്രീനിംഗ് കമ്മിറ്റികളിൽ അംഗമായിരുന്ന ഡോ.പി.സി.മുരളി മാധവൻ കഴിഞ്ഞ വർഷം ജൂണിൽ ഗവർണർക്ക് പരാതി നൽകിയിരുന്നു. ഇതോടൊപ്പം നിയമനവുമായി ബന്ധപ്പെട്ട് സർവകലാശാല സ്ക്രീനിംഗ് കമ്മിറ്റി എടുത്ത തീരുമാനങ്ങളുടെ പകർപ്പും പൊതുജനങ്ങളുടെ ശ്രദ്ധയിൽപ്പെട്ടു. സംസ്കൃതം ജനറൽ വിഷയത്തിൽ എംഎ വേണമെന്നിരിക്കെ സംസ്കൃത സാഹിത്യം, വേദാന്തം വിഷയങ്ങളിലാണു സിലക്‌ഷൻ ലഭിച്ച 3 പേർക്കും എംഎ ഉണ്ടായിരുന്നതെന്ന പരാതി ഉയർന്നിരുന്നു.
ഈ യോഗ്യതയില്ലാത്തതിനാൽ ഇവരെ ഒഴിവാക്കണമെന്ന് സ്ക്രീനിംഗ് കമ്മിറ്റി ശുപാർശ ചെയ്തതായി വിവരാവകാശ രേഖകൾ വ്യക്തമാക്കുന്നു. എന്നാൽ അന്നത്തെ വൈസ് ചാൻസലർ ഡോ. ധർമ്മരാജ് അടാട്ട് അധ്യക്ഷനായ സെലക്ഷൻ കമ്മിറ്റി നിയമവിരുദ്ധമായി അഭിമുഖം നടത്തുകയും നിയമനം നടത്തുകയും ചെയ്തുവെന്നാണ് ആരോപണം. അതേസമയം, ഇവരുടെ നിയമനത്തിൽ തെറ്റില്ലെന്നും മുരളി മാധവൻ ഉൾപ്പെട്ട സ്ക്രീനിംഗ് കമ്മിറ്റി എല്ലാ ചട്ടങ്ങളും പാലിച്ചാണ് നിയമനത്തിന് അനുമതി നൽകിയതെന്നും മുൻ വിസി ഡോ.ധർമ്മരാജ് അടാട്ട് പറഞ്ഞു. എല്ലാ നിയമനങ്ങളിലും കർശന മാനദണ്ഡങ്ങൾ പാലിച്ചിട്ടുണ്ട്. അനാവശ്യമായ വിവാദങ്ങളാണ് ഇപ്പോൾ നടക്കുന്നതെന്നും അദ്ദേഹം പറഞ്ഞു.