10,000 വാക്കുകൾ ഉൾക്കൊള്ളുന്ന ഇന്ത്യൻ ആംഗ്യഭാഷ (ഐഎസ്എൽ) നിഘണ്ടു മൊബൈൽ ആപ്ലിക്കേഷനായ സൈൻ ലേൺ കേന്ദ്ര സർക്കാർ വെള്ളിയാഴ്ച പുറത്തിറക്കി. സാമൂഹ്യനീതി, ശാക്തീകരണ സഹമന്ത്രി പ്രതിമ ഭൂമിക്കാണ് പുതിയ ആപ്പ് പുറത്തിറക്കിയത്. 10,000 വാക്കുകൾ ഉൾക്കൊള്ളുന്ന ഇന്ത്യൻ ആംഗ്യഭാഷാ ഗവേഷണ പരിശീലന കേന്ദ്രത്തിന്‍റെ (ഐ.എസ്.എൽ.ആർ.ടി.സി) ഇന്ത്യൻ ആംഗ്യഭാഷാ നിഘണ്ടുവിനെ അടിസ്ഥാനമാക്കിയുള്ളതാണ് സൈൻ ലേൺ. ആൻഡ്രോയിഡ്, ഐഒഎസ് പതിപ്പുകളിൽ ആപ്ലിക്കേഷൻ ലഭ്യമാണ്. ഐഎസ്എൽ നിഘണ്ടുവിലെ എല്ലാ വാക്കുകളും ഹിന്ദിയിലോ ഇംഗ്ലീഷിലോ തിരയാൻ കഴിയുമെന്നും അധികൃതർ അറിയിച്ചു. ആപ്ലിക്കേഷന്‍റെ സൈൻ വീഡിയോകളും സോഷ്യൽ മീഡിയയിൽ പങ്കിടാം.
ഐഎസ്എൽ നിഘണ്ടു എളുപ്പത്തിൽ ലഭ്യമാക്കുന്നതിനും പൊതുജനങ്ങൾക്ക് എളുപ്പത്തിൽ ആക്‌സസ് ചെയ്യുന്നതിനും വേണ്ടിയാണ് ആപ്പ് വികസിപ്പിച്ചതെന്ന് അദ്ദേഹം പറഞ്ഞു. ഒന്ന് മുതൽ 12 വരെയുള്ള ക്ലാസുകളിലെ എൻസിഇആർടി പാഠപുസ്തകങ്ങൾ ഇന്ത്യൻ ആംഗ്യഭാഷയിലേക്ക് (ഡിജിറ്റൽ ഫോർമാറ്റ്) മാറ്റുന്നുണ്ട്. ഇതിനായി 2020 ഒക്ടോബർ ആറിന് നാഷണൽ കൗൺസിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിംഗുമായി ഐഎസ്എൽആർടിസി അടുത്തിടെ ധാരണാപത്രം ഒപ്പിട്ടിരുന്നു.
കേൾവി വൈകല്യമുള്ള കുട്ടികൾക്കും ഇത് ഗുണം ചെയ്യും. ഈ വർഷം, ആറാം ക്ലാസിലെ എൻസിഇആർടി പാഠപുസ്തകങ്ങളുടെ ഐഎസ്എൽ ഇ-ഉള്ളടക്കം പുറത്തിറക്കിയതായി ഉദ്യോഗസ്ഥൻ കൂട്ടിച്ചേർത്തു. ആസാദി കാ അമൃത് മഹോത്സവത്തിന്‍റെ ഭാഗമായി, നാഷണൽ ബുക്ക് ട്രസ്റ്റിന്‍റെ വീർഗാഥ സീരീസിലെ തിരഞ്ഞെടുത്ത പുസ്തകങ്ങളുടെ ഐഎസ്എൽ പതിപ്പുകൾ കേന്ദ്രം പുറത്തിറക്കിയിരുന്നു. ഐഎസ്എൽആർടിസിയും എൻസിഇആർടിയും സംയുക്തമായാണ് 500 അക്കാദമിക് വാക്കുകൾ ഇന്ത്യൻ ആംഗ്യഭാഷയിൽ പുറത്തിറക്കിയത്. ചരിത്രം, ശാസ്ത്രം, പൊളിറ്റിക്കൽ സയൻസ്, മാത്തമാറ്റിക്സ് എന്നിവയിൽ പലപ്പോഴും ഉപയോഗിക്കുന്ന ഈ അക്കാദമിക് പദങ്ങൾ സെക്കൻഡറി തലത്തിലേക്ക് ഉദ്ദേശിച്ചുള്ളതാണെന്ന് ഉദ്യോഗസ്ഥർ പറഞ്ഞു.