സംസ്ഥാനത്ത് വിലകുറഞ്ഞ മദ്യത്തിന് ക്ഷാമം. സ്റ്റോക്ക് ആവശ്യത്തിന് എത്താത്തതിനാൽ പലയിടത്തും ഔട്ട്ലെറ്റുകൾ കാലിയായി. ജീവനക്കാരും മദ്യത്തിനായി എത്തുന്നവരും തമ്മിൽ പലയിടത്തും വാക്കേറ്റമുണ്ടായി. സ്പിരിറ്റിന്റെ വില വർദ്ധനവ് കാരണം മദ്യക്കമ്പനികൾ ഉൽപാദനം കുറച്ചതാണ് പ്രതിസന്ധിക്ക് കാരണം.
മലപ്പുറം ജില്ലയിലെ മദ്രസ ഉദ്ഘാടനത്തിനിടെ പെണ്കുട്ടിയെ അപമാനിച്ച സംഭവത്തിൽ രൂക്ഷ വിമർശനവുമായി ബിജെപി നേതാവ് ശോഭാ സുരേന്ദ്രൻ. സ്ത്രീവിരുദ്ധവും ലിംഗസമത്വ വിരുദ്ധവുമായ പരാമർശങ്ങൾക്കെതിരെ കേസെടുക്കാത്തത് ഇരട്ടനീതിയാണെന്നും ശോഭാ സുരേന്ദ്രൻ പ്രസ്താവനയിൽ പറഞ്ഞു.
‘നല്ല ഭക്ഷണം നാടിന്റെ അവകാശം’ കാമ്പയിന്റെ ഭാഗമായി ഭക്ഷ്യസുരക്ഷാ വകുപ്പ് ബുധനാഴ്ച 190 സ്ഥാപനങ്ങളിൽ പരിശോധന നടത്തിയതായി ആരോഗ്യമന്ത്രി വീണാ ജോർജ് അറിയിച്ചു. ലൈസൻസോ രജിസ്ട്രേഷനോ ഇല്ലാത്ത 16 കടകൾക്കെതിരെ നടപടിയെടുത്തു. 59 സ്ഥാപനങ്ങൾക്ക് നോട്ടീസ് നൽകി.
പത്താംക്ലാസ് വിദ്യാർത്ഥിയെ പൊതുവേദിയിൽ അവാർഡ് നൽകാൻ ക്ഷണിച്ചതിനെതിരെ സമസ്ത നേതാവിന്റെ പ്രതികരണത്തെ വിമർശിച്ച് ഗവർണർ ആരിഫ് മുഹമ്മദ് ഖാൻ. മുസ്ലീം കുടുംബത്തിൽ ജനിച്ചതിന്റെ പേരിൽ ഒരു പെൺകുട്ടി ഇത്തരത്തിൽ അപമാനിക്കപ്പെടുന്നത് വേദനാജനകമാണെന്നും ഗവർണർ ട്വീറ്റ് ചെയ്തു.
ഒരു സർവകലാശാലയ്ക്ക് നന്നായി പ്രവർത്തിക്കാൻ അറിയില്ലേയെന്ന് സുപ്രീം കോടതി. ജസ്റ്റിസ് യു യു ലളിത് അധ്യക്ഷനായ ബെഞ്ചാണ് മഹാത്മാഗാന്ധി സർവകലാശാലയോട് ഇക്കാര്യം ചോദിച്ചത്. വളഞ്ഞ വഴിയിലൂടെ ജീവനക്കാരെ പിരിച്ചു വിടാനാണ് സർവകലാശാല ശ്രമിക്കുന്നതെന്ന് സുപ്രീം കോടതി ആരോപിച്ചു.
മലയാളത്തിലെ സൂപ്പര്‍ഹിറ്റ് ചിത്രം ജോസഫിൻ്റെ ഹിന്ദി റീമേക്ക് ഷൂട്ടിംഗ് പുരോഗമിക്കുന്നു. മലയാളത്തില്‍ ജോജു ജോര്‍ജ് അവതരിപ്പിച്ച നായക വേഷത്തിലെത്തുന്നത് സണ്ണി ഡിയോള്‍ ആണ്. ബംഗാളി നടി തനുശ്രീ ചക്രവർത്തി നായികയാകുന്നു. എം പദ്‍മകുമാര്‍ തന്നെയാണ് ഹിന്ദിയിലും ചിത്രമൊരുക്കുന്നത്.
അസാനി ചുഴലിക്കാറ്റ് ആന്ധ്രാ തീരത്തോട് അടുക്കുമ്പോൾ കേരളത്തിലും മഴ കനക്കുന്നു. കോട്ടയം, എറണാകുളം, ഇടുക്കി, മലപ്പുറം ജില്ലകളിൽ 12നും ആലപ്പുഴ, എറണാകുളം, ഇടുക്കി ജില്ലകളിൽ 13നും കാലാവസ്ഥ വകുപ്പ് യെല്ലോ അലേർട്ട് പ്രഖ്യാപിച്ചു. സംസ്ഥാനത്ത് ഒറ്റപ്പെട്ട കനത്ത മഴയാണ് പ്രവചിച്ചിരിക്കുന്നത്.
സ്ത്രീകളുടെയും പെൺകുട്ടികളുടെയും സ്വാതന്ത്ര്യത്തെ ഹനിക്കുന്ന നടപടികൾ തിരികെ കൊണ്ടുവരാനുള്ള താലിബാൻ്റെ നീക്കത്തെ അമേരിക്ക അപലപിച്ചു. ഹിജാബ് നിർബന്ധമാക്കാനുള്ള താലിബാൻ്റെ തീരുമാനം എത്രയും വേഗം പിൻവലിക്കണമെന്നും ഇല്ലെങ്കിൽ ശക്തമായ പ്രത്യാഘാതങ്ങൾ ഉണ്ടാകുമെന്നും അമേരിക്ക മുന്നറിയിപ്പ് നൽകി.
പെൺകുട്ടിയെ സമസ്ത വേദിയിൽ നിന്ന് വിലക്കിയ സംഭവത്തെ വിമർശിച്ച് മാത്യു. ടി. തോമസ് എം.എൽ.എ. പെൺകുട്ടിയായത് കൊണ്ട് മാത്രം ഇത്തരം മ്ളേച്ഛത പാടേണ്ടതുണ്ടോയെന്നും ആ കുഞ്ഞു മനസ്സ് വേദനിച്ചില്ലേയെന്നും എം.എൽ.എ ഫേസ്ബുക്ക് പോസ്റ്റിൽ ചോദിച്ചു.
‘1,000 കോടി’ ബോക്സ് ഓഫീസ് ചർച്ചകൾക്ക് പിന്നാലെ പോകുന്നത് സിനിമാ വ്യവസായത്തെ മോശമായി ബാധിക്കുമെന്ന് നടൻ മനോജ് ബാജ്പേയി. സിനിമയുടെ ഉള്ളടക്കത്തെക്കുറിച്ചോ അഭിനേതാക്കളുടെ പ്രകടനത്തെക്കുറിച്ചോ ആരും സംസാരിക്കുന്നില്ലെന്നും എല്ലാവരുടെയും ശ്രദ്ധ 1000 കോടി രൂപയിലാണെന്നും അദ്ദേഹം പറഞ്ഞു.