അഹമ്മദാബാദ്: 36-ാമത് ദേശീയ ഗെയിംസ് ഫുട്‌ബോളില്‍ കേരളം സെമിയിൽ പ്രവേശിച്ചു. ഏറെക്കാലത്തിന് ശേഷമാണ് കേരള ടീം ദേശീയ ഗെയിംസിന്‍റെ സെമി ഫൈനലിലെത്തിയത്. ചൊവ്വാഴ്ച നടന്ന ലീഗ് റൗണ്ടിലെ രണ്ടാം മത്സരത്തിൽ കരുത്തരായ സർവീസസിനെ 3-1ന് തോൽപ്പിച്ചാണ് കേരളം സെമിയിലെത്തിയത്. ആദ്യ മത്സരത്തിൽ ഒഡീഷയേയും തോൽപ്പിച്ച കേരളം ഗ്രൂപ്പ് ജേതാക്കളായി സെമിയിൽ പ്രവേശിച്ചു.
കേരളത്തിനായി 51, 64 മിനിറ്റുകളില്‍ വിഘ്നേഷ് സ്‌കോര്‍ ചെയ്തപ്പോള്‍ 78-ാം മിനിറ്റില്‍ അജീഷിന്റെ വകയായിരുന്നു മൂന്നാം ഗോള്‍. വ്യാഴാഴ്ച നടക്കുന്ന അവസാന ഗ്രൂപ്പ് മത്സരത്തിൽ കേരളം മണിപ്പൂരിനെ നേരിടും.
അതേസമയം, അത്ലറ്റിക്സിൽ ചൊവ്വാഴ്ച കേരളം ഒരു മെഡൽ കൂടി നേടി. വനിതകളുടെ 400 മീറ്റർ ഹർഡിൽസിൽ ആരതി വെള്ളി നേടി. ആരതി 58:57 സെക്കൻഡിൽ ഫിനിഷ് ചെയ്തു. തമിഴ്നാടിന്‍റെ വിത്യ രാമരാജ് 57:57 സെക്കൻഡിൽ ഫിനിഷ് ചെയ്ത് സ്വർണം നേടി.