ലക്നൗ: ആളുകൾ അവരുടെ പ്രായത്തെക്കുറിച്ചും ശമ്പളത്തെക്കുറിച്ചും തുറന്ന് സംസാരിക്കാൻ വിമുഖത കാണിക്കാറുണ്ട്. എന്നാൽ വളരെ അടുപ്പമുള്ള ആളുകളോട് പലപ്പോഴും അതിനെക്കുറിച്ച് നമ്മൾ തുറന്നുപറയാറുണ്ട്. ഇവിടെ, ഒരു പുരുഷൻ തന്‍റെ സ്വന്തം ഭാര്യയോട് തനിക്ക് എത്ര ശമ്പളം ലഭിക്കുമെന്ന് പറയാൻ വിസമ്മതിച്ചതിന്റെ രസകരമായ വാർത്തയാണ് പുറത്തുവരുന്നത്.
ചിലപ്പോൾ ഭാര്യ അതിനെച്ചൊല്ലി വഴക്കിട്ടേക്കാം, അല്ലേ? എന്നാൽ ഇവിടെ ഭാര്യ കുറച്ചുകൂടി പ്രായോഗികമാണ്. ഭർത്താവിന്റെ ശമ്പളം എത്രയാണെന്ന് അറിയാൻ യുപിയിലെ ബറേലി സ്വദേശിയായ സഞ്ജു ഗുപ്ത എന്ന യുവതി വിവരാവകാശ നിയമമാണ് ഉപയോഗിച്ചത്.
2005ലെ വിവരാവകാശ നിയമപ്രകാരം പൊതു വകുപ്പുകളെയും സ്ഥാപനങ്ങളെയും കുറിച്ചുള്ള വിവരങ്ങൾ പൊതുജനങ്ങൾക്ക് നൽകണം. ഈ നിയമത്തിന്റെ ബലത്തിലാണ് അദ്ദേഹത്തിന്‍റെ ഭാര്യയും വിവരാവകാശ നിയമം പ്രയോഗിച്ചത്. ലക്നൗവിലാണ് സംഭവം. ശമ്പളം ചോദിച്ചിട്ടും എത്രയാണെന്ന് ഭർത്താവ് പറയാത്തതിനെ തുടർന്നാണ് സഞ്ജു ഗുപ്ത വിവരാവകാശ നിയമപ്രകാരം അപേക്ഷ നൽകിയത്.
ബറേലിയിലെ ആദായനികുതി ഓഫീസിലെ സെൻട്രൽ പബ്ലിക് ഇൻഫർമേഷൻ ഓഫീസർക്ക് മുമ്പാകെയാണ് സഞ്ജു ഗുപ്ത ആദ്യം അപേക്ഷ സമർപ്പിച്ചത്. എന്നാൽ, ഭർത്താവിന്റെ സമ്മതമില്ലാതെ അത്തരം വിവരങ്ങളൊന്നും നൽകാൻ കഴിയില്ലെന്ന് ചൂണ്ടിക്കാട്ടി സഞ്ജുവിന്‍റെ അപേക്ഷ തള്ളി.
തുടർന്ന് അവർ അപ്പലേറ്റ് അതോറിറ്റിയെ സമീപിച്ചു. എന്നാൽ, അവരും ഈ തീരുമാനത്തെ അംഗീകരിച്ചു. എന്നാൽ, യുവതി വിട്ടുകൊടുക്കാൻ തയ്യാറായില്ല. അവർ കേന്ദ്ര വിവരാവകാശ കമ്മീഷനെ ആശ്രയിച്ചു. ഭർത്താവിന്റെ ശമ്പളത്തെക്കുറിച്ച് സഞ്ജു ഗുപ്തയെ അറിയിക്കാൻ ആദായനികുതി ഓഫീസിലെ സെൻട്രൽ പബ്ലിക് ഇൻഫർമേഷൻ ഓഫീസർക്ക് നിർദേശം നൽകിയിട്ടുണ്ട്.