ഹരിപ്പാട്: സിബിഎസ്ഇ പത്താം ക്ലാസ് ബേസിക് മാത്തമാറ്റിക്സ് പരീക്ഷ എഴുതിയവർക്ക് കണക്ക് ഉൾപ്പെടെയുള്ള ഗ്രൂപ്പുകളിൽ പ്ലസ് വണ്ണിൽ പ്രവേശനം അനുവദിക്കും. കോവിഡ് പ്രതിസന്ധിയിൽ വിദ്യാർത്ഥികൾ നേരിടുന്ന ബുദ്ധിമുട്ടുകൾ കണക്കിലെടുത്താണിത്. എന്നാൽ, കേരള സിലബസിൽ പ്ലസ് വണ്ണിന് ചേരുന്നവർക്ക് സിബിഎസ്ഇയുടെ ഈ ഇളവ് ബാധകമല്ല.
പത്താം ക്ലാസിലേക്ക് സ്റ്റാൻഡേർഡ് മാത്‌സ്, ബേസിക് മാത്‌സ് എന്നിങ്ങനെ രണ്ട് തരം ചോദ്യപേപ്പറുകൾ സിബിഎസ്ഇ തയ്യാറാക്കും. അടിസ്ഥാന ഗണിതത്തിൽ ലളിതമായ ചോദ്യങ്ങൾ അടങ്ങിയിരിക്കുന്നു. ഉപരിപഠനത്തിന് കണക്ക് ആവശ്യമില്ലാത്ത കുട്ടികളാണ് സാധാരണയായി അടിസ്ഥാന ഗണിതം തിരഞ്ഞെടുക്കുന്നത്. 2019 മുതലാണ് സിബിഎസ്ഇ ഈ രീതി നടപ്പാക്കി തുടങ്ങിയത്.
കേരള സിലബസിലെ പ്ലസ് വൺ പ്രവേശനത്തിന് സിബിഎസ്ഇ ഇളവ് ബാധകമാക്കണമെങ്കിൽ ഇവിടെ പ്രോസ്പെക്ടസ് മാറ്റേണ്ടതുണ്ട്. എന്നാൽ, കേരള സിലബസിലേക്കുള്ള അപേക്ഷകൾ തിങ്കളാഴ്ച വരെ സ്വീകരിക്കുകയുള്ളു. അതേസമയം, ചട്ടങ്ങളിൽ മാറ്റം വരുത്തിയേക്കില്ലെന്നാണ് സൂചന.