തിരുവനന്തപുരം: വൈദ്യുതി ബോർഡിലെ മൂവായിരത്തിലധികം തസ്തികകൾ റഗുലേറ്ററി കമ്മിഷൻ വെട്ടിക്കുറച്ചു. നിയമനം നൽകിയതും ഭാവിയിൽ വരാൻ സാധ്യതയുള്ളതുമായ മൂവായിരത്തിലധികം ഒഴിവുകളാണ് കമ്മിഷൻ നീക്കം ചെയ്യുന്നത്. ആറ് മാസത്തിനകം മാനവ വിഭവശേഷി വിലയിരുത്തണമെന്നും റെഗുലേറ്ററി കമ്മീഷൻ നിർദ്ദേശിച്ചു.
2027 വരെ 33,371 തസ്തികകൾക്ക് വൈദ്യുതി ബോർഡ് അനുമതി തേടിയിരുന്നെങ്കിലും 30,321 തസ്തികകൾ മാത്രമാണ് കമ്മീഷൻ അംഗീകരിച്ചത്. വിവിധ വ്യക്തികളിൽ നിന്നും സ്ഥാപനങ്ങളിൽ നിന്നും വാദങ്ങൾ കേട്ട ശേഷമാണ് തീരുമാനം. അതേസമയം, 2010 വരെ 1,610 ജീവനക്കാരെയും 2012 ൽ സർക്കാർ ഉത്തരവ് പ്രകാരം ജോലി ലഭിച്ച 1,248 പേരെയും നിയമിക്കാൻ കമ്മീഷൻ അംഗീകാരം നൽകി. 2013 ൽ ഡയറക്ടർ ബോർഡിന്‍റെ തീരുമാനപ്രകാരം, ജോലി ലഭിച്ച 288 ഉദ്യോഗാർത്ഥികളുടെ നിയമനത്തിന് കമ്മീഷൻ അംഗീകാരം നൽകി.
അതേസമയം, ശമ്പളച്ചെലവ് സ്വന്തം നിലയ്ക്ക് നിയന്ത്രിക്കാനുള്ള നടപടികൾ ബോർഡ് നേരത്തെ തന്നെ ആരംഭിച്ചിരുന്നു. ആവശ്യമെങ്കിൽ ഉപയോഗശൂന്യമായ തസ്തികകൾ വെട്ടിക്കുറയ്ക്കാനും ബോർഡ് തീരുമാനിച്ചിരുന്നു. തസ്തികകളുടെ എണ്ണം പുനഃപരിശോധിക്കണമെന്നും ജീവനക്കാരുടെ എണ്ണം കുറയ്ക്കണമെന്നും കോഴിക്കോട് ഐ.എ.എം ആവശ്യപ്പെട്ടു. 2015-ൽ നടത്തിയ ഒരു പഠനത്തിലും ഇത് ശുപാർശ ചെയ്തിരുന്നു.