പി.സി ജോർജിന്റെ അറസ്റ്റിൽ പ്രതികരണവുമായി മന്ത്രി പി.രാജീവ്. പിസി ജോർജിന്റെ അറസ്റ്റ് രാഷ്ട്രീയ പ്രേരിതമാണെന്നത് ആരോപണം മാത്രമാണെന്ന് അദ്ദേഹം പറഞ്ഞു. നിയമം അതിന്റെ വഴിക്ക് പോകട്ടെയെന്നും എല്ലാ കേസന്വേഷണങ്ങളും ദ്രുതഗതിയിൽ നടക്കുന്നുണ്ടെന്നും രാജീവ് പ്രതികരിച്ചു. എകെജി സെൻറർ ആക്രമണത്തെക്കുറിച്ച് അന്വേഷണം നടക്കുകയാണെന്നും പ്രതികളെ ഉടൻ പിടികൂടുമെന്നും അദ്ദേഹം പറഞ്ഞു.
അതേസമയം പിസി ജോർജിനെതിരായ ആരോപണങ്ങളിൽ ഉറച്ചുനിൽക്കുന്നുവെന്ന് പരാതിക്കാരി പറഞ്ഞു. പരാതിക്ക് പിന്നിൽ ഗൂഢാലോചനയില്ല. രക്ഷാപ്രവർത്തനത്തിനെത്തിയ ആളിൽ നിന്ന് മോശം അനുഭവമുണ്ടായി. ഒരു പ്രത്യേക സാഹചര്യത്തിൽ എനിക്ക് അത് പോലീസിനോട് വെളിപ്പെടുത്തേണ്ടിവന്നു. ഫെബ്രുവരിയിൽ നടന്ന സംഭവവുമായി ബന്ധപ്പെട്ടാണ് പരാതി നൽകിയത്. താൻ കഠിനാധ്വാനിയായ സ്ത്രീയാണെന്നും രാഷ്ട്രീയ പിന്തുണയില്ലെന്നും പരാതിക്കാരി പറഞ്ഞു.
സോളാർ തട്ടിപ്പുകേസിലെ പ്രതികളുടെ രഹസ്യമൊഴിയുടെ അടിസ്ഥാനത്തിലാണ് ജനപക്ഷം നേതാവ് പിസി ജോർജിനെ മ്യൂസിയം പൊലീസ് അറസ്റ്റ് ചെയ്തത്. ഈ വർഷം ഫെബ്രുവരി 10ന് തിരുവനന്തപുരത്തെ ഒരു ഗസ്റ്റ് ഹൗസിൽ വച്ച് ലൈംഗിക താൽപര്യത്തോടെ കടന്നുപിടിക്കുകയും അശ്ലീല സന്ദേശങ്ങൾ അയക്കുകയും ചെയ്തതായി പ്രതി രഹസ്യമൊഴി നൽകിയിരുന്നു. അതേസമയം, ഒരു വൃത്തികേടും കാണിച്ചിട്ടില്ലെന്ന് പിസി ജോർജ് പ്രതികരിച്ചു. ഇത് കള്ളക്കേസാണെന്നും തൻറെ നിരപരാധിത്വം തെളിയിക്കുമെന്നും അദ്ദേഹം കൂട്ടിച്ചേർത്തു.