കൊച്ചി: കെ.എസ്.ആർ.ടി.സി ഓഫീസിന് മുന്നിലെ സമരം തുടർന്നാൽ സ്ഥിരമായി ശമ്പളം നൽകാനുള്ള ഉത്തരവ് പിൻവലിക്കേണ്ടി വരുമെന്ന് കേരള ഹൈക്കോടതി എംപ്ലോയീസ് യൂണിയനോട് പറഞ്ഞു. തെറ്റായി പെരുമാറിയാൽ സിഎംഡിയെ തൽസ്ഥാനത്ത് നിന്ന് എങ്ങനെ നീക്കം ചെയ്യണമെന്ന് കോടതിക്ക് അറിയാം. മറ്റൊരു യൂണിയൻ എന്താണ് ചെയ്യുന്നതെന്ന് നോക്കിയാണോ സിഐടിയു പ്രവർത്തിക്കുന്നതെന്ന് ജസ്റ്റിസ് ദേവൻ രാമചന്ദ്രൻ ചോദിച്ചു.
ധർണയുമായി മുന്നോട്ട് പോയാൽ ശമ്പളം ഒരിക്കലും ശരിയായി ലഭിക്കില്ലെന്ന് കോടതി യൂണിയനുകളെ ഓർമിപ്പിച്ചു. സർക്കാർ ഇടപെട്ടാൽ മാത്രമേ കെ.എസ്.ആർ.ടി.സിക്ക് ശമ്പളം കൃത്യമായി നൽകാൻ കഴിയൂ. ഇതിനിടയിൽ കെ.എസ്.ആർ.ടി.സിയുടെ പ്രവർത്തനത്തെ ബാധിക്കുന്ന വിധത്തിൽ മുന്നോട്ട് പോയാൽ ഒരു തരത്തിലും അത് അനുവദിക്കാനാവില്ല.
സമരം പിൻവലിച്ചില്ലെങ്കിൽ ഹർജി പരിഗണിക്കുന്നത് മാറ്റിവയ്ക്കുമെന്ന് അദ്ദേഹം മുന്നറിയിപ്പ് നൽകി. അതോടെ സി.ഐ.ടി.യുവിന് വഴങ്ങേണ്ടി വന്നു. കെ.എസ്.ആർ.ടി.സി മേധാവിയുടെ ഓഫീസിന് മുന്നിൽ നടന്ന ധർണയിൽ നിന്ന് പിൻമാറാൻ തയ്യാറാണെന്ന് സി.ഐ.ടി.യു അഭിഭാഷകൻ കോടതിയെ അറിയിച്ചു. ഇതിന് പിന്നാലെയാണ് കോടതി ഇടക്കാല ഉത്തരവ് പുറപ്പെടുവിച്ചത്.