തിരുവനന്തപുരം: മുഖ്യമന്ത്രി പിണറായി വിജയനോട് മൂന്ന് ചോദ്യങ്ങളുമായി മാത്യു കുഴൽനാടൻ എം.എൽ.എ. ഗൾഫ് സന്ദർശന വേളയിൽ നയതന്ത്ര ചാനൽ വഴി ബാഗ് കേരളത്തിൽ നിന്ന് കൊണ്ടുപോയോ? ഉണ്ടെങ്കിൽ ഇക്കാര്യത്തിൽ മുഖ്യമന്ത്രി മറുപടി പറയണമെന്നും അദ്ദേഹം പറഞ്ഞു. കഴിഞ്ഞ ദിവസം നിയമസഭയിൽ ഈ ചോദ്യങ്ങൾക്കൊന്നും മുഖ്യമന്ത്രി മറുപടി നൽകിയില്ലെന്നും മാത്യു കുഴൽനാടൻ വാർത്താസമ്മേളനത്തിൽ ആരോപിച്ചു.
യു.എ.ഇ സന്ദർശന വേളയിൽ ബാഗ് മറന്നിട്ടില്ലെന്ന് നിയമസഭയിൽ ചോദ്യങ്ങൾക്ക് മറുപടിയായി മുഖ്യമന്ത്രി പറഞ്ഞു. എന്നാൽ മുഖ്യമന്ത്രി യു.എ.ഇയിലായിരിക്കുമ്പോൾ ‘മുഖ്യമന്ത്രിക്ക് വേണ്ടി’ എന്നുപറഞ്ഞ് ഏതെങ്കിലും ബാഗ് സ്വീകരിച്ചിട്ടുണ്ടോ ഇല്ലയോ? അങ്ങനെ ലഭിച്ചിട്ടുണ്ടെങ്കിൽ, എന്തുകൊണ്ട് അത് സാധാരണ റൂട്ടിൽ അയച്ചില്ല? ഡിപ്ലോമാറ്റിക് ചാനലിലൂടെ ലഭിച്ചത് അതേ ബാഗ് തന്നെയാണോ? ഈ മൂന്ന് ചോദ്യങ്ങൾക്കും മുഖ്യമന്ത്രി മറുപടി പറയണമെന്നും കുഴൽനാടൻ ആവശ്യപ്പെട്ടു.
മുഖ്യമന്ത്രിയുടെ യു.എ.ഇ സന്ദർശന വേളയിൽ ഒരു ബാഗ് എടുക്കാൻ മറന്നതായി ശിവശങ്കർ കസ്റ്റംസിന് നൽകിയ മൊഴിയിൽ പറയുന്നു. എന്നാൽ, അത്തരമൊരു ബാഗ് മറന്നിട്ടില്ലെന്ന് മുഖ്യമന്ത്രി നിയമസഭയിൽ രേഖാമൂലം മറുപടി നൽകി.