തിരുവനന്തപുരം : തിരുവനന്തപുരത്തെ പ്രധാന സർക്കാർ, സ്വകാര്യ സ്ഥാപനങ്ങളിലേക്കുള്ള യാത്ര സുഗമമാക്കുന്നതിനായി ആരംഭിച്ച സിറ്റി സർക്കുലർ സർവീസിന് ഇനി ഇലക്ട്രിക് ബസുകൾ ലഭ്യമാകും. ഇതിനായി കെ.എസ്.ആർ.ടി.സി-സ്വിഫ്റ്റ് വാങ്ങിയ 25 ഇലക്ട്രിക് ബസുകളിൽ ആദ്യത്തെ അഞ്ചെണ്ണം തിരുവനന്തപുരത്തെത്തി. കെ.എസ്.ആർ.ടി.സി-സ്വിഫ്റ്റ് ഡൽഹിയിലെ പി.എം.ഐ ഇലക്ട്രോ മൊബിലിറ്റി സൊല്യൂഷനിൽ നിന്നാണ് ബസുകൾ വാങ്ങിയത്.
ഇലക്ട്രിക് ബസ് സ്വന്തമാക്കുക എന്ന കെ.എസ്.ആർ.ടി.സിയുടെ ചിരകാല സ്വപ്നമാണ് യാഥാർത്ഥ്യമായതെന്ന് ഇലക്ട്രിക് ബസിൽ ആദ്യ യാത്ര നടത്തിയ ഗതാഗത മന്ത്രി ആന്റണി രാജു പറഞ്ഞു. തിരുവനന്തപുരം നഗരത്തിൽ എല്ലാ ബസുകളും നിശ്ചിത കാലയളവിനുള്ളിൽ ഇലക്ട്രിക് ആക്കി മാറ്റും. ആദ്യഘട്ടത്തിൽ 50 ബസുകൾക്കാണ് ടെൻഡർ നൽകിയത്. തയ്യാറായ 25 ബസുകളിൽ ആദ്യ അഞ്ചെണ്ണം വെള്ളിയാഴ്ച തലസ്ഥാനത്തെത്തി. ശനിയാഴ്ച അഞ്ച് ബസുകൾ കൂടി എത്തും. ബാക്കി 15 ബസുകൾ തിങ്കളാഴ്ച ഹരിയാനയിൽ നിന്ന് പുറപ്പെടും. രജിസ്ട്രേഷൻ ഉൾപ്പെടെയുള്ള നടപടിക്രമങ്ങൾ പൂർത്തിയാക്കി ഈ ബസുകൾ ഉടൻ സർവീസ് നടത്തുമെന്നും മന്ത്രി പറഞ്ഞു.
നിലവിൽ ഡീസൽ ബസുകൾ സർവീസ് നടത്തുമ്പോൾ കിലോമീറ്ററിന് 37 രൂപയാണ് ഈടാക്കുന്നത്. ഇലക്ട്രിക് ബസിലേക്ക് മാറുമ്പോൾ 20 രൂപയിൽ താഴെയാണ് ചെലവ് വരിക. നിലവിലെ ഇന്ധന വില വർദ്ധനവിന്റെ പശ്ചാത്തലത്തിൽ ഇലക്ട്രിക് ബസുകൾക്ക് ഗുണകരമാകും. തമ്പാനൂർ, കിഴക്കേക്കോട്ട, പാപ്പനംകോട് എന്നിവിടങ്ങളിൽ ചാർജിംഗ് സ്റ്റേഷനുകളും ഉണ്ടാകും. നഗരത്തിലെ സർക്കുലറിൽ പ്രതിദിന യാത്രക്കാരുടെ എണ്ണം 1,000 ൽ നിന്ന് 28,000 ആയി ഉയർന്നത് ജനങ്ങൾ ഏറ്റെടുത്തതിന്റെ തെളിവാണെന്നും മന്ത്രി പറഞ്ഞു.