ഡൽഹി: പഞ്ചാബി ഗായകൻ സിദ്ദു മൂസെ വാലയുടെ കൊലപാതകവുമായി ബന്ധപ്പെട്ട് രണ്ട് പേരെ ഡൽഹി പോലീസ് അറസ്റ്റ് ചെയ്തു. ഷാർപ്പ് ഷൂട്ടർമാരായ പ്രിയവ്രത് ഫൗജി, കാശിഷ് എന്നിവരെയാണ് പോലീസ് അറസ്റ്റ് ചെയ്തത്. ഇവരുടെ പക്കൽ നിന്ന് ആയുധങ്ങളും സ്ഫോടക വസ്തുക്കളും കണ്ടെടുത്തിട്ടുണ്ട്. ഗുജറാത്തിലെ മുന്ദ്രയിൽ നിന്നാണ് ഇവരെ അറസ്റ്റ് ചെയ്തത്. ഹരിയാന ആസ്ഥാനമായി പ്രവർത്തിക്കുന്ന ഗുണ്ടാസംഘത്തിന്റെ ഭാഗമാണ് ഇവർ. രാം കരൺ എന്നയാളാണ് ഈ സംഘത്തിന്റെ നേതാവ്.
ഗായകൻ കൊല്ലപ്പെട്ട ദിവസം പ്രിയവ്രത് ഫൗജി ഒരു ഗുണ്ടാസംഘത്തെ കണ്ടിരുന്നു. നേരത്തെ രണ്ട് കൊലപാതക കേസുകളിൽ പ്രതിയായ ഫൗജി 2015 ൽ അറസ്റ്റിന് വിധേയനായിരുന്നു. ഫൗജിക്കൊപ്പം അറസ്റ്റിലായ കാശിഷ് 2021ലെ കൊലക്കേസിലെ പ്രതിയാണ്. ഗായകന് നേരെ വെടിയുതിർത്ത സംഘത്തിൽ ഇവരും ഉണ്ടായിരുന്നു. ഫൗജിയുടെ നേതൃത്വത്തിലാണ് സംഘത്തെ നയിച്ചതെന്ന് പൊലീസ് പറഞ്ഞു. ഇതേ സംഘത്തിലുണ്ടായിരുന്ന സന്തോഷ് ജാദവിനെ ജൂൺ 18നാണ് പോലീസ് അറസ്റ്റ് ചെയ്തത്. ഇയാളിൽ നിന്ന് 13 അനധികൃത പിസ്റ്റളുകളും എട്ട് മൊബൈൽ ഫോണുകളും കണ്ടെടുത്തു. സംഘത്തിലെ എട്ടോളം പേരെ പൊലീസ് തിരിച്ചറിഞ്ഞിട്ടുണ്ട്.
മെയ് 29നാണ് പഞ്ചാബിലെ മാൻസ ജില്ലയിൽ ഗായകനും രാഷ്ട്രീയ പ്രവർത്തകനുമായ സിദ്ദു മൂസെ വാലയെ ഒരു കൂട്ടം ഗുണ്ടകൾ വെടിവച്ച് കൊന്നത്. സംസ്ഥാന സർക്കാർ സുരക്ഷ വെട്ടിക്കുറച്ചതിന് തൊട്ടുപിന്നാലെയാണ് ഇയാൾക് വെടിയേറ്റത്. റഷ്യൻ നിർമ്മിത എഎൻ-94 റൈഫിൾ ഉപയോഗിച്ചാണ് അക്രമികൾ വെടിയുതിർത്തത്. കാനഡ ആസ്ഥാനമായുള്ള ഗുണ്ടാസംഘമായ ഗോൾഡി ബ്രാർ ഒരു ഫേസ്ബുക്ക് പോസ്റ്റിലൂടെ മൂസെ വാലയുടെ കൊലപാതകത്തിന്റെ ഉത്തരവാദിത്തം ഏറ്റെടുത്തിരുന്നു. ദില്ലിയിലെ തിഹാർ ജയിലിൽ കഴിഞ്ഞിരുന്ന സംഘത്തലവൻ ലോറൻസ് ബിഷ്ണോയിയും ഗായകന്റെ കൊലപാതകത്തിൽ തന്റെ ഗ്രൂപ്പിനു പങ്കുണ്ടെന്ന് വെളിപ്പെടുത്തിയിരുന്നു.