തിരുവനന്തപുരം: കായംകുളത്തെ ഭക്ഷ്യവിഷബാധയിൽ വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി റിപ്പോർട്ട് തേടി. വിശദാംശങ്ങൾ ഉടൻ അന്വേഷിക്കാൻ പൊതുവിദ്യാഭ്യാസ ഡയറക്ടർക്ക് നിർദ്ദേശം നൽകിയിട്ടുണ്ട്. കഴിഞ്ഞ ദിവസം കായംകുളം പുത്തൻ റോഡ് ടൗൺ യു.പി സ്കൂളിൽ ഉച്ചഭക്ഷണം കഴിച്ച കുട്ടികൾക്ക് അസ്വസ്ഥതയും വയറുവേദനയും ഛർദ്ദിയും അനുഭവപ്പെട്ടിരുന്നു.
കുട്ടികൾ സ്കൂളിൽ നിന്ന് ചോറും സാമ്പാറും പയറും കഴിച്ചു. 20 കുട്ടികളാണ് താലൂക്ക് ആശുപത്രിയിൽ ചികിത്സ തേടിയത്. സംഭവത്തെ തുടർന്ന് ജില്ലാ മെഡിക്കൽ ഓഫീസർമാരോട് റിപ്പോർട്ട് തേടുമെന്ന് വിദ്യാഭ്യാസ മന്ത്രി വി.ശിവൻകുട്ടി പറഞ്ഞു. സിവിൽ സപ്ലൈസ് കോർപ്പറേഷൻ വിതരണം ചെയ്യുന്ന സാധനങ്ങളുടെ ഗുണനിലവാരം പരിശോധിക്കുമെന്നും അദ്ദേഹം പറഞ്ഞു.
കൊട്ടാരക്കര കല്ലുവാതുക്കൽ അങ്കണവാടിയിൽ വിതരണം ചെയ്ത ഭക്ഷണം കഴിച്ച കുട്ടികൾക്കും അസ്വസ്ഥത അനുഭവപ്പെട്ടു. കുട്ടികൾക്ക് വയറിളക്കവും ഛർദ്ദിയും ഉണ്ടായതിനെ തുടർന്ന് മാതാപിതാക്കൾ പരിശോധന നടത്തുകയും പുഴുബാധയുള്ള അരി കണ്ടെത്തുകയും ചെയ്തു. വിശദമായ അന്വേഷണം നടത്തുമെന്ന് മുനിസിപ്പൽ അധികൃതർ അറിയിച്ചു. ചികിത്സ തേടിയ നാല് കുട്ടികളെയും ആശുപത്രിയിൽ നിന്ന് ഡിസ്ചാർജ് ചെയ്തു.