വിക്രമിന്‍റെ ബോക്സ് ഓഫീസ് ഓപ്പണിംഗ് കമൽ ഹാസന്‍റെ ഒരു വലിയ തിരിച്ചുവരവായി ആണ് ട്രേഡ് അനലിസ്റ്റുകൾ വിലയിരുത്തുന്നത്. എന്നാൽ ചിത്രം തിയേറ്ററുകളിൽ എത്തി ആഴ്ചകൾക്ക് ശേഷം കമൽ ഹാസന്‍റെ കരിയറിൽ മാത്രമല്ല, തമിഴ് സിനിമാ ചരിത്രത്തിലും വിക്രം റെക്കോർഡ് സൃഷ്ടിച്ചു. ചിത്രം തമിഴ്നാട്ടിൽ 113 ദിവസം ഓടി. കോയമ്പത്തൂരിലെ കെ.ജി സിനിമാസ് ഉൾപ്പെടെയുള്ള ചില കേന്ദ്രങ്ങളിൽ കഴിഞ്ഞ ദിവസമാണ് സിനിമയുടെ തിയേറ്റർ റൺ അവസാനിപ്പിച്ചത്. തമിഴ്നാട്ടിലെ തമിഴ് സിനിമയുടെ ബോക്സ് ഓഫീസ് ചരിത്രത്തിലെ നിരവധി റെക്കോർഡുകളും ചിത്രം തകർത്തു.
തമിഴ് സിനിമാ ചരിത്രത്തിൽ തമിഴ്നാട്ടിൽ ഏറ്റവും കൂടുതൽ ടിക്കറ്റുകള്‍ വിറ്റഴിക്കപ്പെട്ട ചിത്രമാണ് വിക്രം. വിക്രമിന്‍റെ ഒന്നരക്കോടി ടിക്കറ്റുകൾ തമിഴ്നാട്ടിൽ മാത്രം വിറ്റഴിഞ്ഞു. ഇതിൽ നിന്നുള്ള ലാഭം 182.5 കോടി രൂപയാണ്. മാത്രമല്ല, ചിത്രത്തിന്‍റെ ഡിസ്ട്രിബ്യൂട്ടര്‍ വിഹിതം 92 കോടി രൂപയാണ്. ഇതെല്ലാം തമിഴ് സിനിമയുടെ ചരിത്രത്തിലെ വലിയ റെക്കോർഡുകളാണ്. മുമ്പൊരിക്കലും ഒരു തമിഴ് ചിത്രവും തമിഴ്നാട്ടിൽ ഇത്രയധികം ഗ്രോസ് നേടിയിട്ടില്ല. എസ്.എസ്. രാജമൗലിയുടെ ബാഹുബലി: ദി കൺക്ലൂഷനെ മറികടന്നാണ് വിക്രം ഈ നേട്ടം കൈവരിച്ചത്.
അതേസമയം, ചിത്രം ആഗോള ബോക്സ് ഓഫീസിൽ 435 കോടി രൂപ നേടി. ആഗോള ബോക്സ് ഓഫീസിൽ നിന്നുള്ള ഡിസ്ട്രിബ്യൂട്ടര്‍ വിഹിതം 200 കോടി രൂപയ്ക്കടുത്താണ്. തെലുങ്കിൽ നിന്ന് 42.5 കോടിയും കേരളത്തിൽ നിന്ന് 40.5 കോടിയുമാണ് ചിത്രം നേടിയത്.