മണിരത്നം സംവിധാനം ചെയ്ത പൊന്നിയിൻ സെൽവന്‍റെ ആദ്യ ഭാഗം സെപ്റ്റംബർ 30ന് റിലീസ് ചെയ്യും. ഐശ്വര്യ റായ്, വിക്രം, ജയം രവി, കാർത്തി, തൃഷ, ഐശ്വര്യ ലക്ഷ്മി, ജയറാം, പ്രകാശ് രാജ്, ശരത്കുമാർ തുടങ്ങി നിരവധി താരങ്ങൾ ചിത്രത്തിൽ അണിനിരക്കുന്നുണ്ട്.
500 കോടി ബഡ്ജറ്റിൽ ഒരുക്കുന്ന ചിത്രത്തിലെ അഭിനേതാക്കളുടെ പ്രതിഫലത്തെക്കുറിച്ച് മുൻപേ റിപ്പോർട്ടുകൾ ഉണ്ടായിരുന്നു. സിനിമയിൽ ഏറ്റവും കൂടുതൽ പ്രതിഫലം വാങ്ങുന്ന നടൻ വിക്രമാണ്. 10 കോടി രൂപയാണ് ഐശ്വര്യ റായിക്ക് ലഭിക്കുന്നതെന്നാണ് റിപ്പോർട്ടുകൾ. ആദിത്യ കരികാലൻ എന്ന കഥാപാത്രത്തെ വിക്രവും നന്ദിനിയായി ഐശ്വര്യയും വേഷമിടുന്നു.
അരുണ്‍മൊഴി വര്‍മ്മനായെത്തുന്ന ജയം രവിക്കും വന്ദ്യദേവനായി വേഷമിടുന്ന കാർത്തിക്കും അഞ്ച് കോടി രൂപയാണ് പ്രതിഫലം. ചോള രാജകുമാരി കുന്ദവായിയായി വേഷമിടുന്ന തൃഷയ്ക്ക് രണ്ട് കോടി രൂപയാണ് പ്രതിഫലം. പ്രകാശ് രാജിനും ഐശ്വര്യ ലക്ഷ്മിക്കും 1.5 കോടി രൂപ വീതം ലഭിക്കുമെന്നാണ് റിപ്പോർട്ട്.