ശ്രീശാന്ത് മറ്റൊരു മേഖലയിലേക്ക് കടക്കുകയാണ്. ഗായകനായാണ് ശ്രീശാന്ത് പുതിയ അരങ്ങേറ്റം കുറിക്കുന്നത്. നിരുപ് ഗുപ്ത നിർമ്മിച്ച് എൻജി ഫിലിംസിന് വേണ്ടി പാലൂരാൻ സംവിധാനം ചെയ്യുന്ന ‘ഐറ്റം നമ്പർ 1’ എന്ന ബോളിവുഡ് ചിത്രത്തിൽ പിന്നണി ഗായകനാകാൻ ഒരുങ്ങുകയാണ് ക്രിക്കറ്റ് താരം ശ്രീശാന്ത്.
മലയാളി സൈനികൻ മേജർ സന്ദീപ് ഉണ്ണികൃഷ്ണൻറെ കഥ പറയുന്ന ‘മേജർ’ എന്ന ചിത്രത്തിൻറെ ട്രെയിലർ പുറത്തിറങ്ങി. ഹിന്ദി, തെലുങ്ക്, മലയാളം എന്നീ ഭാഷകളിലാണ് ട്രെയിലറുകൾ പുറത്തിറങ്ങിയിരിക്കുന്നത്. ഈ മൂന്ന് ഭാഷകളിലായി ജൂൺ മൂന്നിന് ചിത്രം തിയേറ്ററുകളിലെത്തും.
ശിവകാർത്തികേയൻ ചിത്രം ഡോൺ മെയ് 13ന് തീയേറ്ററുകളിൽ പ്രദർശനത്തിനെത്തും. യു സർട്ടിഫിക്കറ്റോടെയാണ് ചിത്രം വരുന്നത്. സിബി ചക്രവർത്തി സംവിധാനം ചെയ്യുന്ന ആക്ഷൻ കോമഡി ചിത്രമാണ് ഡോൺ. എസ് ജെ സൂര്യ, പ്രിയങ്ക, സമുദ്രക്കനി, സൂരി എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.
നടി ആക്രമിക്കപ്പെട്ട കേസിൽ അതിജീവിതക്ക് നീതി ലഭിക്കണമെന്ന് രഞ്ജിനി ഹരിദാസ് ആവശ്യപ്പെട്ടു. സംഭവത്തോട് പ്രതികരിക്കുകയല്ലാതെ തനിക്ക് ഒന്നും ചെയ്യാൻ കഴിയില്ലെന്നും ഒരു ഇന്ത്യൻ പൗരൻ എന്ന നിലയിൽ അത് തന്റെ ഉത്തരവാദിത്തവും അവകാശവുമാണെന്നും രഞ്ജിനി പറഞ്ഞു.
കഴിഞ്ഞ ദിവസം വാഗമണ്ണിൽ ഓഫ് റോഡ് റൈഡിൽ പങ്കെടുത്തതിന് നടൻ ജോജു ജോർജിനെതിരെ കേസെടുക്കണമെന്നാവശ്യപ്പെട്ട് കെ.എസ്.യു പരാതി നൽകി. പരിപാടി സംഘടിപ്പിച്ചവർക്കെതിരെയും പങ്കെടുത്ത ജോജു ജോർജിനെതിരെയും കേസെടുക്കണമെന്ന് ആവശ്യപ്പെട്ട് കെ.എസ്.യു ഇടുക്കി ജില്ലാ പ്രസിഡൻറ് ടോണി തോമസാണ് പരാതി നൽകിയത്.