ചെന്നൈ: തെന്നിന്ത്യൻ നടി നയന്താരയും സംവിധായകൻ വിഘ്നേഷ് ശിവനും ഇന്ന് വിവാഹിതരാകുന്നു. തമിഴ്നാട്ടിലെ മഹാബലിപുരത്തെ ഷെറാട്ടണ്‍ ഗ്രാന്‍ഡ് ഹോട്ടലില്‍ വച്ചാണ് വിവാഹം. ചടങ്ങുകൾ രാവിലെ ആരംഭിക്കും. സിനിമാ മേഖലയിലെ വളരെ അടുത്ത സുഹൃത്തുക്കളും ബന്ധുക്കളും മാത്രമേ വിവാഹച്ചടങ്ങിൽ പങ്കെടുക്കൂ എന്നാണ് അറിയുന്നത്. ഏഴ് വർഷത്തെ പ്രണയത്തിനൊടുവിലാണ് നയന്താരയും വിഘ്നേഷും വിവാഹിതരാകാൻ തീരുമാനിച്ചത്.
രജനീകാന്ത്, കമൽ ഹാസൻ, വിജയ് സേതുപതി, സൂര്യ, സാമന്ത, ചിരഞ്ജീവി, ആര്യ തുടങ്ങിയ സൂപ്പർതാരങ്ങൾ വിവാഹത്തിൽ പങ്കെടുത്തേക്കുമെന്ന് അഭ്യൂഹങ്ങളുണ്ട്. ഷാരൂഖ് ഖാനും ചടങ്ങിൽ പങ്കെടുക്കുമെന്ന് റിപ്പോർട്ടുകളുണ്ട്. വിവാഹ വേദിയും പരിസരവും കനത്ത സുരക്ഷയിലാണ്. വിവാഹ മണ്ഡപത്തിലെത്താൻ ക്ഷണക്കത്തിനൊപ്പം നൽകിയിരിക്കുന്ന പ്രത്യേക കോഡ് നമ്പർ നൽകണം.
വിവാഹ വേദിയിൽ ഒരു കച്ചേരിയും ഷെഡ്യൂൾ ചെയ്തിട്ടുണ്ട്. നയന്താരയുടെയും വിഘ്നേഷ് ശിവൻറെയും വിവാഹത്തിനുള്ള ആനിമേറ്റഡ് ക്ഷണം ഇതിനോടകം തന്നെ സോഷ്യൽ മീഡിയയിൽ വൈറലായിക്കഴിഞ്ഞു. മുഹൂർത്ത സമയം വ്യക്തമാക്കിയിട്ടില്ലെങ്കിലും രാവിലെ 8.30 മുതൽ അതിഥികൾക്ക് എത്താമെന്ന് ക്ഷണക്കത്തിൽ പറയുന്നു.