ആരാധനാലയങ്ങളിൽ ഉച്ചഭാഷിണികളുടെ ഉപയോഗം നിയന്ത്രിക്കാൻ സർക്കാർ ഡി.ജി.പിയെ ചുമതലപ്പെടുത്തി. ശബ്ദനിയന്ത്രണം കർശനമാക്കാനുള്ള നടപടികളുടെ ഭാഗമായാണ് സർക്കാർ തീരുമാനം. ബാലാവകാശ കമ്മീഷന്റെ ഇടപെടലിനെ തുടർന്നാണ് ആഭ്യന്തര വകുപ്പ് ഉത്തരവിറക്കിയത്. ഉത്സവ മൈതാനങ്ങൾ ഉൾപ്പെടെയുള്ള മതപരമായ ചടങ്ങുകൾക്ക് ഈ നിയന്ത്രണം ബാധകമായിരിക്കും.
ഉച്ചഭാഷിണികളും മറ്റ് സംഗീത ഉപകരണങ്ങളും അമിതമായ ശബ്ദത്തിൽ ഉപയോഗിക്കുന്നത് കുട്ടികൾക്കും പ്രായമായവർക്കും രോഗികൾക്കും ആരോഗ്യത്തിൻ ഭീഷണി ഉയർത്തുന്നുവെന്ന് ആരോപണമുണ്ട്. നിലവിൽ രാത്രി 10 മുതൽ രാവിലെ 6 വരെ അടച്ചിട്ട സ്ഥലങ്ങളിൽ ഉച്ചഭാഷിണികൾ ഉപയോഗിക്കാൻ പാടില്ലെന്നാണ് ചട്ടം. അനുമതിയില്ലാതെ ഉച്ചഭാഷിണികൾ ഉപയോഗിക്കാൻ പാടില്ലെന്ന ചട്ടമുണ്ടെങ്കിലും അത് പാലിക്കപ്പെടുന്നില്ലെന്നാണ് ആക്ഷേപം.
2020 ൽ പ്രാബൽയത്തിൽ വന്ന ശബ്ദ മലിനീകരണ നിയന്ത്രണ നിയന്ത്രണങ്ങൾ കേരളം ഫലപ്രദമായി നടപ്പാക്കിയിട്ടില്ലെന്ന് ബാലാവകാശ കമ്മിഷൻ പറയുന്നു. ബാലാവകാശ കമ്മീഷൻറെ ഇടപെടലിനെ തുടർന്ന് സർക്കാർ വിശദമായ പരിശോധന നടത്തിയിരുന്നു. ശബ്ദമലിനീകരണവുമായി ബന്ധപ്പെട്ട് കോടതി ഉത്തരവുകൾ ഉണ്ടായിരുന്നെങ്കിലും അത് പാലിക്കപ്പെടുന്നതായി കണ്ടെത്തിയില്ല. ഇതാണ് പരിശോധനയ്ക്ക് ശേഷം സർക്കാർ കണ്ടെത്തിയത്.