പാചക എണ്ണയുടെ വില ഇടിയുന്നു

മുംബൈ: ഇറക്കുമതി-കയറ്റുമതി നിയന്ത്രണങ്ങൾ കാരണം പാചക എണ്ണ വില കുത്തനെ ഉയരുകയും ഒരാഴ്ചയ്ക്കുള്ളിൽ വില കുറയുകയും ചെയ്യുന്നു. അന്താരാഷ്ട്ര വിപണിയിൽ എണ്ണയുടെ വില കുറഞ്ഞതും സർക്കാർ ഇറക്കുമതി തീരുവ കുറച്ചതുമാണ് രാജ്യത്ത് പാചക എണ്ണയുടെ വില കുറയാൻ കാരണം. പാമോയിൽ, സൂര്യകാന്തി, സോയാബീൻ, കടുക് തുടങ്ങിയ എണ്ണകളുടെ വിപണി വില 15 രൂപ മുതൽ 20 രൂപ വരെ കുറയും. അദാനി വിൽമെർ, ഫോർച്യൂൺ, ധാര, മദർ ഡയറി, ഫ്രീഡം, ജെമിനി തുടങ്ങിയ ബ്രാൻഡുകളും എണ്ണ വില കുറയ്ക്കുമെന്ന് അറിയിച്ചിട്ടുണ്ട്.

വില കുറയുന്നതോടെ അനുബന്ധ ഉൽപ്പന്നങ്ങളുടെ വിലയും കുറയും. പാമോയിൽ, സൂര്യകാന്തി, സോയാബീൻ, കടുക് എണ്ണകൾ അസംസ്കൃത വസ്തുക്കളായി ഉപയോഗിക്കുന്ന എല്ലാ ഉൽപ്പന്നങ്ങളുടെയും വില കുറയാൻ സാധ്യതയുണ്ട്. സോപ്പ്, ഷാംപൂ, ബിസ്കറ്റ്, കേക്കുകൾ, നൂഡിൽസ് തുടങ്ങിയ വിവിധ ഉൽപ്പന്നങ്ങളുടെ വില കുറയാം. 

ലോകത്ത് ഏറ്റവും കൂടുതൽ ഭക്ഷ്യ എണ്ണ ഇറക്കുമതി ചെയ്യുന്ന രാജ്യമാണ് ഇന്ത്യ. ഇവയിൽ, പാം ഓയിലും സോയാബീൻ എണ്ണയുമാണ് ഇന്ത്യ ഏറ്റവും കൂടുതൽ ഇറക്കുമതി ചെയ്യുന്നത്. പ്രതിവർഷം 13.5 ദശലക്ഷം ടൺ ഭക്ഷ്യ എണ്ണയാണ് ഇന്ത്യ ഇറക്കുമതി ചെയ്യുന്നത്. ഇതിൽ 8 മുതൽ 8.5 ദശലക്ഷം ടൺ (ഏകദേശം 63 ശതമാനം) പാമോയിലാണ്. എണ്ണയുടെ വില കുറയുന്നതോടെ ഭക്ഷ്യമേഖലയിലും വില കുറയും. വിലക്കയറ്റത്തിൽ നട്ടംതിരിയുന്ന ജനങ്ങൾക്ക് പാചക എണ്ണ വിലയിലെ കുറവ് ആശ്വാസം നൽകും. ഇത് അടുക്കള ബജറ്റ് കുറയ്ക്കാൻ സഹായിക്കും.