ജമ്മു കശ്മീരിലെ ശ്രീനഗറിൽ നാല് ഹൈബ്രിഡ് ഭീകരരെ അറസ്റ്റ് ചെയ്തു. അറസ്റ്റിലായവർക്ക് ലഷ്കർ ഇ തൊയ്ബയുമായി ബന്ധമുണ്ടെന്ന് പോലീസ് അറിയിച്ചു. ഹൈബ്രിഡ് തീവ്രവാദികളെ ഒന്നോ രണ്ടോ തവണ മാത്രമേ ആക്രമണങ്ങൾക്കായി ഉപയോഗിക്കൂ. അറസ്റ്റിലായവരിൽ നിന്ന് നാല് പിസ്റ്റളുകളും പൊലീസ് പിടിച്ചെടുത്തു.
ജാതി സെൻസസ് ആവശ്യപ്പെട്ട് ബിഹാറിൽ നിന്ന് ഡൽഹിയിലേക്ക് പദയാത്ര നടത്തുമെന്ന് ആർജെഡി നേതാവ് തേജസ്വി യാദവ് പ്രഖ്യാപിച്ചു. ദേശീയ തലത്തിൽ ജാതി സെൻസസ് നടത്താൻ കഴിയില്ലെന്ന് കേന്ദ്ര സർക്കാർ നിലപാടെടുത്ത സാഹചര്യത്തിലാണ് തേജസ്വിയുടെ പദയാത്ര പ്രഖ്യാപിച്ചത്.
ഹനുമാൻ ചാലിസ വിവാദത്തിനിടെ അടുത്ത 15 ദിവസത്തേക്ക് സംസ്ഥാനത്ത് ഉച്ചഭാഷിണി ഉപയോഗിക്കാൻ മുൻകൂർ അനുമതി വാങ്ങാൻ കർണാടക സർക്കാർ ഉത്തരവിട്ടു. ആഭ്യന്തര വകുപ്പുമായി നടത്തിയ കൂടിക്കാഴ്ചയ്ക്ക് ശേഷം മുഖ്യമന്ത്രി ബസവരാജ് ബൊമ്മൈയാണ് ഇത് സംബന്ധിച്ച പ്രഖ്യാപനം നടത്തിയത്.
അമ്മയ്ക്കും കുഞ്ഞിനും ഒരുമിച്ച് ഉറങ്ങാൻ ഇന്ത്യയിൽ ട്രെയിനുകളിൽ പ്രത്യേക ബെർത്ത് സംവിധാനം വരുന്നു. മാതൃദിനത്തോടനുബന്ധിച്ച് പരീക്ഷണാടിസ്ഥാനത്തിൽ ലഖ്നൗ ഡിവിഷനിൽ തേഡ് എസി കോച്ചിൽ രണ്ട് സ്പെഷ്യൽ ബെർത്തുകൾ ഇങ്ങനെ തയ്യാറാക്കിയിട്ടുണ്ട്. സാധാരണ സീറ്റിൽ മടക്കിവെയ്ക്കാവുന്ന തരത്തിലുള്ളതാണ് ബേബി സീറ്റ്.
അസമിലെ 60% പ്രദേശങ്ങളിൽ നിന്നും അഫ്സ്പ നീക്കം ചെയ്തതായി കേന്ദ്ര ആഭ്യന്തര മന്ത്രി അമിത് ഷാ അറിയിച്ചു. വരും വർഷങ്ങളിൽ സംഘർഷം കുറയുന്നത് നോക്കി അഫ്സ്പ പൂർണമായും സംസ്ഥാനത്ത് നിന്ന് നീക്കം ചെയ്യുമെന്നും അമിത് ഷാ പറഞ്ഞു. അസമിന്റെ വരും നാളുകൾ…
സ്വിഗ്ഗി തങ്ങളുടെ പിക്ക്-അപ്പ്, ഡ്രോപ്പ്-ഓഫ് സർവീസായ ജിനി, പ്രധാന മെട്രോ സിറ്റികളിൽ ഉടനീളം താൽക്കാലികമായി നിർത്തിവച്ചതായി റിപ്പോർട്ട്. വിതരണ തൊഴിലാളികളുടെ കുറവ് കാരണമാണ് സർവീസ് നിർത്തിവെച്ചിരിക്കുന്നത്.
ശ്രീലങ്കയിൽ രാഷ്ട്രീയവും സാമ്പത്തികവുമായ സ്ഥിരത പുനസ്ഥാപിക്കാൻ ഇന്ത്യ പൂർണ പിന്തുണ വാഗ്ദാനം ചെയ്തു. പ്രധാനമന്ത്രി മഹിന്ദ രാജപക്സെ രാജിവെച്ചതോടെ ശ്രീലങ്കയിലെ സർക്കാർ അനുകൂല, സർക്കാർ വിരുദ്ധ സമരങ്ങൾ പ്രതിഷേധമായി മാറിയിരിക്കുകയാണ്. സർക്കാർ സ്ഥാപനങ്ങൾക്കും ഔദ്യോഗിക വസതികൾക്കും നേരെ ആക്രമണം ശക്തമാണ്.
രാജ്യദ്രോഹക്കുറ്റം ചുമത്താൻ അധികാരം നൽകുന്ന സെക്ഷൻ 124 എ പുനഃപരിശോധന, പൂർത്തിയാകുന്നതുവരെ മരവിപ്പിച്ചു കൂടെയെന്ന് സുപ്രീം കോടതി. നിലപാട് നാളെ അറിയിക്കാൻ സുപ്രീം കോടതി കേന്ദ്ര സർക്കാരിന് നിർദേശം നൽകി. രാജ്യദ്രോഹക്കുറ്റം ദുരുപയോഗം ചെയ്യപ്പെടുകയാണെന്ന് സുപ്രീം കോടതി നിരീക്ഷിച്ചു.
സംസ്കൃത വിദ്യാഭ്യാസം വിദ്യാർത്ഥികൾക്ക് കൂടുതൽ തൊഴിലവസരങ്ങൾ സൃഷ്ടിക്കുമെന്ന് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ. കേന്ദ്ര സംസ്കൃത സർവകലാശാല സംഘടിപ്പിക്കുന്ന ത്രിദിന ഉത്കർഷ് മഹോത്സവത്തിൻറെ അവസാന ദിവസത്തെ അഭിസംബോധന ചെയ്യുകയായിരുന്നു അദ്ദേഹം.
കുത്തബ് മിനാറിന്റെ പേര്’വിഷ്ണു സ്തംഭ്’ എന്നാക്കി മാറ്റണം എന്നാവശ്യപ്പെട്ട് വലതുപക്ഷ സംഘടനകളുടെ പ്രതിഷേധം. മഹാകൽ മാനവ് സേന ഉൾപ്പെടെയുള്ള സംഘടനകളാണ് പ്രതിഷേധം സംഘടിപ്പിച്ചത്. സംഘർഷാവസ്ഥയെ തുടർന്ന് പ്രദേശത്ത് വൻ പോലീസ് സന്നാഹത്തെ വിന്യസിച്ചു.