ഷിഗെല്ല പടരുന്ന സാഹചര്യത്തിൽ കാസർകോട് ജില്ലയിൽ പ്രതിരോധ പ്രവർത്തനങ്ങൾ കർശനമാക്കി ആരോഗ്യവകുപ്പ്. ഹോട്ടലുകളിലെ പരിശോധനയ്ക്ക് ശേഷം വെള്ളത്തിന്റെ സാമ്പിളുകൾ ശേഖരിച്ചു. രാത്രിയിൽ പ്രവർത്തിക്കുന്ന ഹോട്ടലുകളിൽ കർശന പരിശോധന നടത്തുമെന്ന് ആരോഗ്യമന്ത്രി വീണാ ജോർജ് അറിയിച്ചു.
കേരളത്തെ വഴിത്തിരിവുകളില്ലാത്ത സംസ്ഥാനമാക്കുമെന്ന് മന്ത്രി എം.വി ഗോവിന്ദൻ മാസ്റ്റർ പറഞ്ഞു. കാർഷിക മേഖലയെ മുന്നോട്ടുകൊണ്ടുപോകാനുള്ള ദൃഢനിശ്ചയത്തോടെയാണ് സർക്കാർ പ്രവർത്തിക്കുന്നതെന്നും അദ്ദേഹം പറഞ്ഞു. കൃഷിവകുപ്പിന്റെ കണ്ണൂർ ജില്ലാതല പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
തൃക്കാക്കര ഉപതിരഞ്ഞെടുപ്പിൽ ഇടത് സ്ഥാനാർത്ഥിയുടെ കാര്യത്തിൽ അനിശ്ചിതത്വം തുടരുന്നു. വ്യാഴാഴ്ച സ്ഥാനാർത്ഥിയെ പ്രഖ്യാപിക്കും. ഇടതുമുന്നണി യോഗത്തിന് ശേഷമായിരിക്കും തീരുമാനം. സ്ഥാനാർത്ഥി നിർണയം പൂർത്തിയായിട്ടില്ലെന്ന് എൽ.ഡി.എഫ് കൺവീനർ ഇ.പി ജയരാജനും മന്ത്രി പി.രാജീവും പറഞ്ഞു.
ഇതുവരെയുള്ള കണക്കുപ്രകാരം കൊവിഡ് കാലത്ത് അഞ്ചുലക്ഷത്തോളം മലയാളികള്‍ക്കാണ് വിവിധ ഗള്‍ഫ് രാജ്യങ്ങളില്‍ തൊഴില്‍ നഷ്ടമായത്. ഇവരിൽ ഭൂരിഭാഗവും നാട്ടിലേക്ക് മടങ്ങിയപ്പോള്‍ ചെറിയൊരു പക്ഷം പുതിയൊരു തൊഴില്‍ അന്വേഷിച്ച് ഗള്‍ഫ് നാടുകളില്‍ അലയുകയാണ്.
വിദ്വേഷ പ്രസംഗക്കേസിൽ പി.സി ജോർജിന് ജാമ്യം നൽകിയതിനെതിരെ സർക്കാർ നാളെ അപ്പീൽ നൽകും. ജാമ്യം പിൻവലിക്കണമെന്നാവശ്യപ്പെട്ട് ജില്ലാ കോടതിയെ സമീപിക്കും. വിഷയത്തിൽ പോലീസ് നിയമോപദേശം തേടി. വർഗീയ പരാമർശം നടത്തിയെന്ന പരാതിയിൽ അറസ്റ്റിലായ മുൻ എംഎൽഎയ്ക്ക് മജിസ്ട്രേറ്റ് കോടതിയാണ് ജാമ്യം അനുവദിച്ചത്.
ഉപതിരഞ്ഞെടുപ്പ് നടക്കുന്ന തൃക്കാക്കരയിൽ സജീവമായി ഇടപെടുമെന്ന് സിൽവർ ലൈൻ വിരുദ്ധ സമിതി അറിയിച്ചു. സിൽവർലൈൻ വിരുദ്ധ ആശയങ്ങൾ മണ്ഡലത്തിലുടനീളം പ്രചരിപ്പിക്കാനാണ് പദ്ധതി. കൺവെൻഷനുകൾ ശനിയാഴ്ച ആരംഭിക്കും. ഒരു രാഷ്ട്രീയ പാർട്ടിക്കും പ്രത്യേക പിന്തുണ നൽകില്ലെന്ന് പ്രഖ്യാപിച്ചിട്ടുണ്ട്.
യൂട്യൂബർ റിഫാ മെഹ്നുവിന്റെ ദുരൂഹ മരണവുമായി ബന്ധപ്പെട്ട് മൃതദേഹം പുറത്തെടുക്കാൻ അനുമതി. അന്വേഷണ സംഘത്തിന്റെ അഭ്യർത്ഥന പരിഗണിച്ചാണ് കോഴിക്കോട് ആർ.ഡി.ഒ ഇതിന് അനുമതി നൽകിയത്. ദുബായിൽ പോസ്റ്റ്മാർട്ടം നടത്തിയെന്ന് പറഞ്ഞ് ഭർത്താവ് മെഹ്നാസ് വഞ്ചിച്ചുവെന്ന് റിഫയുടെ കുടുംബം ആരോപിച്ചിരുന്നു.
തൃക്കാക്കരയിലെ യു.ഡി.എഫ് സ്ഥാനാർത്ഥി ഉമാ തോമസ് അങ്കമാലി അതിരൂപത ആർച്ച് ബിഷപ്പ് ആന്റണി കരിയിലുമായി കൂടിക്കാഴ്ച നടത്തി. എല്ലാവരോടും വോട്ട് ചോദിക്കുമെന്നും മറ്റ് സാമുദായിക നേതാക്കളെ കാണുമെന്നും ഉമാ തോമസ് പറഞ്ഞു.
കാസർഗോഡ് മട്ടാലയിൽ സ്വകാര്യ ബസ് മറിഞ്ഞു. കാസർഗോഡ്-കണ്ണൂർ റൂട്ടിലോടുന്ന സ്വകാര്യ ബസാണ് അപകടത്തിൽപ്പെട്ടത്. സംഭവത്തിൽ നിരവധി യാത്രക്കാർക്ക് പരിക്കേറ്റു. ബസിന്റെ അമിത വേഗതയാണ് അപകടകാരണമെന്നാണ് പ്രാഥമിക നിഗമനം. ബസ് നിയന്ത്രണം വിട്ട് മറിയുകയായിരുന്നുവെന്ന് ദൃക്സാക്ഷികൾ പറഞ്ഞു.ആരുടെയും പരിക്ക് ഗുരുതരമല്ല.
വ്യവസായത്തിൽ വ്യക്തിമുദ്ര പതിപ്പിച്ച മീരാൻ കമ്പനികളുടെ ഗ്രൂപ്പിന്റെ ഭാഗമായ നന്മ പ്രോപ്പർട്ടീസ് ലിമിറ്റഡിന്റെ വൺ കൊച്ചി പദ്ധതിക്ക് തുടക്കമായി. സംസ്ഥാനത്തെ റിയൽ എസ്റ്റേറ്റ് മേഖലയിൽ നൂതനമായ മാറ്റങ്ങൾ വരുത്തുക എന്ന ലക്ഷ്യത്തോടെയാണ് കൊച്ചി വൈറ്റിലയിൽ പദ്ധതിക്ക് തുടക്കമിട്ടത്.