തൃക്കാക്കരയിലെ എൽ.ഡി.എഫ് സ്ഥാനാർത്ഥി ഡോ.ജോ ജോസഫ് പെരുന്ന എൻ.എസ്.എസ് ആസ്ഥാനത്തെത്തി. എൻഎസ്എസ് ജനറൽ സെക്രട്ടറി സുകുമാരൻ നായരുമായി ജോ ജോസഫ് ചർച്ച നടത്തുകയാണ്. യു.ഡി.എഫ്, ബി.ജെ.പി സ്ഥാനാർത്ഥികൾ നേരത്തെ എൻ.എസ്.എസ് ആസ്ഥാനത്തെത്തി സുകുമാരൻ നായരെ കണ്ടിരുന്നു.
‘സിൽവർ ലൈനിനെക്കുറിച്ച് അറിയേണ്ടതെല്ലാം’ എന്ന തലക്കെട്ടിൽ കൈപ്പുസ്തകം പുറത്തിറക്കാൻ സംസ്ഥാന സർക്കാരിന്റെ തീരുമാനം. അഞ്ച് ലക്ഷം കൈപ്പുസ്തകങ്ങൾ അച്ചടിക്കാൻ അനുമതി നൽകിയിട്ടുണ്ട്. പ്രിന്റിംഗ് ചാർജുകൾക്കും പേപ്പർ വിലയ്ക്കുമായി 7.5 ലക്ഷം രൂപ അനുവദിച്ചിട്ടുണ്ട്.
അപകീർത്തികരമായ വ്യാജവാർത്ത പ്രചരിപ്പിച്ചെന്നാരോപിച്ച് പയ്യന്നൂർ എം.എൽ.എ ടി.ഐ മധുസൂദനൻ ഏഷ്യാനെറ്റ് ന്യൂസിന് വക്കീൽ നോട്ടീസ് അയച്ചു. ഒരു കോടി രൂപ നഷ്ടപരിഹാരം നൽകണമെന്നാണ് അഭിഭാഷകൻ ആവശ്യപ്പെട്ടിരിക്കുന്നത്. അഡ്വ. കെ. വിജയകുമാർ മുഖേനയാണ് വക്കീൽ നോട്ടീസ് അയച്ചത്.
സർക്കാർ ജീവനക്കാർക്ക് ശമ്പളം നൽകാനാകാത്ത വിധം സംസ്ഥാനം കടുത്ത സാമ്പത്തിക പ്രതിസന്ധിയിലേക്ക് നീങ്ങുകയാണ്. കേന്ദ്രത്തിൽ നിന്ന് കടമായി ആവശ്യപ്പെട്ട 4,000 കോടി രൂപ നൽകാത്തതാണ് പ്രതിസന്ധി രൂക്ഷമാക്കിയത്. ശമ്പളത്തിന്റെ 10 ശതമാനം മാറ്റിവയ്ക്കാൻ ധനവകുപ്പിന് മുമ്പാകെ നിർദ്ദേശമുണ്ടെന്നാണ് വിവരം.
വർധിപ്പിച്ച നിരക്ക് ഈടാക്കാൻ വൈകിയതിനാൽ കെ.എസ്.ആർ.ടി.സിക്ക് കോടിക്കണക്കിന് രൂപയുടെ നഷ്ടമുണ്ടായി. മെയ് 1 മുതൽ നിരക്ക് വർദ്ധനവ് പ്രാബല്യത്തിൽ വന്നെങ്കിലും പല ബസുകളും ഇതുവരെ പുതിയ നിരക്കുകൾ നടപ്പാക്കിയിട്ടില്ല. കെ.എസ്.ആർ.ടി.സിക്ക് പ്രതിദിനം 30 ലക്ഷം രൂപയുടെ നഷ്ടമുണ്ടായെന്നാണ് കണക്ക്.
കൊട്ടിയം പുഞ്ചിരിച്ചിറയിൽ കിണറ്റിൽ വളയം ഇറക്കുന്നതിനിടെ അപകടത്തിൽപ്പെട്ട തൊഴിലാളിക്ക് വേണ്ടിയുള്ള രക്ഷാപ്രവർത്തനം തുടരുന്നു. കിണറ്റിൽ ഇറങ്ങുന്നതിനിടെയാണ് മുട്ടക്കാവ് സ്വദേശി സുധീർ കുടുങ്ങിയത്. 16 മണിക്കൂറായി നടത്തുന്ന രക്ഷാപ്രവർത്തനം ഇപ്പോഴും തുടരുകയാണ്.
അതത് വർഷം ജൂൺ ഒന്നിന് അഞ്ച് വയസ് പൂർത്തിയാകാത്ത കുട്ടികൾക്ക് ഒന്നാം ക്ലാസിൽ പ്രവേശനത്തിന് അർഹതയില്ലെന്ന് പൊതുവിദ്യാഭ്യാസ വകുപ്പ് പുറത്തിറക്കിയ കരടിൽ വ്യക്തമാക്കുന്നു. മൂന്നാം വയസ്സിൽ ആരംഭിക്കുന്ന പ്രീ-സ്കൂൾ വിദ്യാഭ്യാസത്തിന് ശേഷം പ്രൈമറി ക്ലാസുകളിലേക്ക് പ്രവേശനം നടത്തണമെന്ന് എൻഇപി നിഷ്കർഷിക്കുന്നു.
തൃക്കാക്കരയിൽ ട്വന്റി 20 യുഡിഎഫിനെ പിന്തുണയ്ക്കുമെന്നാണ് പ്രതീക്ഷയെന്ന് കോൺഗ്രസ് നേതാവ് രമേശ് ചെന്നിത്തല.സർക്കാരിൽ നിന്ന് ബുദ്ധിമുട്ടുകൾ നേരിടുന്ന ഒരു കൂട്ടം ആളുകളാണ് ട്വന്റി 20. സർക്കാരിന് തിരിച്ചടി നൽകാൻ ട്വന്റി 20 മുന്നോട്ട് വരുമെന്നാണ് പ്രതീക്ഷയെന്നും ചെന്നിത്തല പറഞ്ഞു.
തൃക്കാക്കരയിൽ മുഖ്യമന്ത്രി പിണറായി വിജയന്റെ പ്രചാരണത്തിന് ഇന്ന് തുടക്കമാകും. എൽ.ഡി.എഫ് കൺവെൻഷൻ മുഖ്യമന്ത്രി ഉദ്ഘാടനം ചെയ്യും. കോൺഗ്രസുമായി ഇടഞ്ഞ് നിൽക്കുന്ന കെ വി തോമസും മുഖ്യമന്ത്രിയുടെ പരിപാടിയിൽ പങ്കെടുക്കും.
വരാപ്പുഴ അതിരൂപതയുടെ രാഷ്ട്രീയകാര്യ സമിതി യോഗം ഇന്ന് ചേരും. തൃക്കാക്കര ഉപതിരഞ്ഞെടുപ്പിൽ സഭയുടെ നിലപാട് തീരുമാനിക്കാനാണ് യോഗം ചേരുന്നത്. കഴിഞ്ഞ ദിവസം ചേർന്ന യോഗത്തിൽ ലത്തീൻ സഭ സർക്കാരിനെതിരെ ശക്തമായ പ്രതിഷേധം ഉയർത്തിയിരുന്നു. വൈകീട്ട് ആറിനാണ് രാഷ്ട്രീയകാര്യ സമിതി യോഗം.