ബോളിവുഡ് നടൻ സൽമാൻ ഖാനുമായി സാമ്യമുള്ള അസം അൻസാരിയാണ് അറസ്റ്റിലായത്. പൊതുസ്ഥലത്ത് വീഡിയോ ഷൂട്ട് ചെയ്തതിന് ശേഷം ആളുകളെ സംഘടിപ്പിച്ചുവെന്നാരോപിച്ചാണ് ഉത്തർ പ്രദേശ് പോലീസ് ഇയാളെ അറസ്റ്റ് ചെയ്തത്. വീഡിയോ ഷൂട്ട് കാണാൻ ആളുകൾ തടിച്ചുകൂടിയതിനാൽ ഗതാഗതം തടസ്സപ്പെട്ടു.
രാജ്യദ്രോഹക്കുറ്റം ചുമത്താൻ അധികാരം നൽകുന്ന ഇന്ത്യൻ ശിക്ഷാ നിയമത്തിലെ 124 എ വകുപ്പിലെ ചില വകുപ്പുകൾ പുനഃപരിശോധിക്കാൻ കേന്ദ്ര സർക്കാർ തീരുമാനിച്ചു. സുപ്രീം കോടതിയിൽ സമർപ്പിച്ച പുതിയ സത്യവാങ്മൂലത്തിലാണ് കേന്ദ്രം ഇക്കാര്യം വ്യക്തമാക്കിയിരിക്കുന്നത്.
രാജ്യത്തെ ഭൂരിഭാഗം സാധനങ്ങളുടെയും വില കുത്തനെ ഉയരുകയാണ്. നിത്യോപയോഗ സാധനങ്ങളുടെ വിലക്കയറ്റം ദിനംപ്രതി ജനജീവിതം ദുസ്സഹമാക്കുന്നു. ഇതിനെല്ലാം പുറമേ, ഒരു കനത്ത പ്രഹരം പോലെ, അടിവസ്ത്രങ്ങളുടെ വില ഇപ്പോൾ ഉയരുകയാണ്. പരുത്തിയുടെ വില വർദ്ധിച്ചതാണ് അടിവസ്ത്രങ്ങളുടെ വില വർദ്ധനവിന് കാരണം.
ഉപതിരഞ്ഞെടുപ്പ് നടക്കുന്ന തൃക്കാക്കരയിലെ താരം ക്രിസ്ത്യൻ സഭയാണെന്ന് വെള്ളാപ്പള്ളി നടേശൻ. അവിടെ സഭ തിളങ്ങുന്നുണ്ടെന്ന് വെള്ളാപ്പള്ളി അഭിപ്രായപ്പെട്ടു. ശക്തമായ ത്രികോണ മത്സരമാണ് തൃക്കാക്കരയിൽ നടക്കുന്നത്.
നമ്മുടെ ഭക്ഷണമല്ലാത്തതിനാൽ ഷവർമ കഴിക്കരുതെന്ന് തമിഴ്നാട് ആരോഗ്യമന്ത്രി മാ സുബ്രഹ്മണ്യൻ ജനങ്ങളോട് അഭ്യർത്ഥിച്ചു. കേരളത്തിൽ ഷവർമ കഴിച്ച് ഭക്ഷ്യവിഷബാധയേറ്റ് വിദ്യാർത്ഥി മരിച്ചതിന് പിന്നാലെയാണ് മന്ത്രിയുടെ അഭ്യർത്ഥന. കേരളത്തിലും തമിഴ്നാട്ടിലും ഭക്ഷ്യസുരക്ഷാ വകുപ്പിൻറെ കർശന പരിശോധനയും പുരോഗമിക്കുകയാണ്.
കർണാടകയിൽ രണ്ട് മാസത്തിനുള്ളിൽ 1,000 ഇലക്ട്രിക് വെഹിക്കിൾ ചാർജിംഗ് സ്റ്റേഷനുകൾ സ്ഥാപിക്കും. പ്രധാന ടൂറിസ്റ്റ് കേന്ദ്രങ്ങൾ, ദേശീയ, സംസ്ഥാന പാതകൾ, ചെറിയ പട്ടണങ്ങൾ എന്നിവിടങ്ങളിൽ പുതിയ ചാർജിംഗ് സ്റ്റേഷനുകൾ സ്ഥാപിക്കും. സർക്കാർ സ്ഥാപനങ്ങളുടെ ഭൂമി ഇതിനായി ഉപയോഗിക്കും.
എം.ബി.എ പ്രവേശന പരീക്ഷയുടെ ഉത്തരസൂചിക പ്രവേശന പരീക്ഷാ കമ്മീഷണറുടെ വെബ്സൈറ്റിൽ പ്രസിദ്ധീകരിച്ചു. പരാതികളുള്ള പരീക്ഷാർഥികൾ പരാതിയോടൊപ്പം അനുബന്ധരേഖകളും ഫീസും ഉൾപ്പടെ 13ആം തീയതി 2 മണിക്ക് മുമ്പ്‌ തപാൽ വഴിയോ നേരിട്ടോ പ്രവേശനപ്പരീക്ഷാ കമ്മിഷണർക്ക്‌ നൽകണം.
ജഹാംഗീർപുരിയിലെ പൊളിക്കൽ ഒരു മതവിഭാഗത്തെ ലക്ഷ്യം വച്ചുള്ളതല്ലെന്ന് നോർത്ത് ഡൽഹി മുനിസിപ്പൽ കോർപ്പറേഷൻ. സുപ്രീംകോടതിയിൽ നൽകിയ സത്യവാങ്മൂലത്തിലാണ് ഇക്കാര്യം വ്യക്തമാക്കിയിരിക്കുന്നത്. ഏപ്രിൽ 20നും മുമ്പും നടന്ന കുടിയൊഴിപ്പിക്കലിൽ അനധികൃത കെട്ടിടങ്ങൾ മാത്രമാണ് പൊളിച്ചതെന്നും കോർപ്പറേഷൻ പറയുന്നു.
ഷഹീൻബാഗിലെ കയ്യേറ്റങ്ങൾ നിയമവിരുദ്ധമാണെങ്കിൽ നീക്കം ചെയ്യാമെന്ന് സുപ്രീം കോടതി. ഹർജിക്കാർ ഹൈക്കോടതിയെ സമീപിക്കണമെന്നും നേരിട്ട് സുപ്രീംകോടതിയിൽ വരരുതെന്നും കോടതി പറഞ്ഞു. എല്ലാ കുടിയൊഴിപ്പിക്കലുകളും തടയാനാവില്ലെന്നും കോടതി വ്യക്തമാക്കി. കുടിയൊഴിപ്പിക്കലിനെതിരെ സി.പി.എം നൽകിയ ഹർജിയിലാണ് ഈ പരാമർശം.
ശ്രീലങ്കൻ പ്രധാനമന്ത്രി മഹിന്ദ രാജപക്സെ രാജിവച്ചു. രാജ്യത്ത് സാമ്പത്തിക പ്രതിസന്ധി കൂടുതൽ രൂക്ഷമാകുകയും ഇതിനെതിരെ ജനകീയ പ്രക്ഷോഭം ശക്തിപ്പെടുകയും ചെയ്തതോടെയാണ് രാജപക്സെ രാജിവച്ചത്. ശ്രീലങ്കയിൽ പ്രതിഷേധം രൂക്ഷമായ സാഹചര്യത്തിൽ വീണ്ടും കർഫ്യൂ പ്രഖ്യാപിക്കുകയും സേനയെ നിയോഗിക്കുകയും ചെയ്തിരുന്നു.