കെ.എസ്.ആർ.ടി.സിയിലെ ശമ്പള പ്രതിസന്ധിയുമായി ബന്ധപ്പെട്ട് ഗതാഗത മന്ത്രി ആന്റണി രാജു നാളെ യൂണിയനുകളുമായി ചർച്ച നടത്തും. ശമ്പളം ലഭിച്ചില്ലെങ്കിൽ നാളെ അർദ്ധരാത്രി മുതൽ പണിമുടക്കുമെന്ന് യൂണിയനുകൾ അറിയിച്ചതിനെ തുടർന്നാണ് തീരുമാനം.
ലോക മാധ്യമ സ്വാതന്ത്ര സൂചികയിൽ ഇന്ത്യ വീണ്ടും പിന്നിലായി. 180 രാജ്യങ്ങളിൽ 142-ാം സ്ഥാനത്തായിരുന്ന ഇന്ത്യ ഇപ്പോൾ 150-ാം സ്ഥാനത്താണ്. ആഗോള മാധ്യമ നിരീക്ഷകർ പുറത്തുവിട്ട റിപ്പോർട്ടിലാണ് ഇക്കാര്യം പറയുന്നത്. നേപ്പാൾ ഒഴികെയുള്ള ഇന്ത്യയുടെ അയൽരാജ്യങ്ങളുടെ റാങ്കിംഗും ഇടിഞ്ഞു.
കേരള പബ്ലിക് സർവീസ് കമ്മീഷൻ 45 ഒഴിവുകളിലേക്ക് അപേക്ഷ ക്ഷണിച്ചു. www.keralapsc.gov.in വഴി അപേക്ഷ സമർപ്പിക്കണം. ഒഴിവുകൾ മൂന്ന് ഗസറ്റുകളിലായി പ്രസിദ്ധീകരിച്ചു. അപേക്ഷ സ്വീകരിക്കുന്ന അവസാന തീയതി ജൂൺ 1 ആയിരിക്കും.
ഏപ്രില്‍ മാസത്തെ വാഹന വില്‍പ്പനയില്‍ മുന്നേറ്റവുമായി മഹീന്ദ്ര ആന്റ് മഹീന്ദ്ര. വാഹന വില്‍പ്പനയില്‍ 25 ശതമാനം വര്‍ധനവാണ് മഹീന്ദ്ര നേടിയത്. ഏപ്രിലില്‍ 45,640 യൂണിറ്റുകളാണ് വിറ്റഴിച്ചത്. ആഭ്യന്തര വിപണിയിലെ പാസഞ്ചര്‍ വാഹന വില്‍പ്പന 23 ശതമാനം വര്‍ധിച്ചു.
മുദ്രവച്ച കവറിൽ കോടതികളിൽ റിപ്പോർട്ട് ചെയ്യുന്ന വിഷയത്തിൽ ആധികാരിക നിലപാട് സ്വീകരിക്കണമെന്ന് മീഡിയ വൺ സുപ്രീം കോടതിയോട് ആവശ്യപ്പെട്ടു. ജിഗ്നേഷ് മേവാനിയുടെ കേസിൽ അസം കോടതിയിൽ മുദ്രവച്ച കവറിലാണ് റിപ്പോർട്ട് സമർപ്പിച്ചതെന്ന് മീഡിയ വണ്ണിന് വേണ്ടി ഹാജരായ അഭിഭാഷകൻ കോടതിയെ അറിയിച്ചു.
ഭീമ കൊറേഗാവ് കലാപകേസിൽ തെലുങ്ക് കവി പി. വരവര റാവു ഉൾപ്പെടെ മൂന്ന് പേർക്ക് ജാമ്യം ലഭിച്ചില്ല. വരവര റാവു, ആക്ടിവിസ്റ്റുകളായ അരുൺ ഫെരേര, വെര്‍നോന്‍ ഗോണ്‍സാല്‍വസ് എന്നിവര്‍ക്കാണ് ബോംബെ ഹൈക്കോടതി ജാമ്യം നിഷേധിച്ചത്.
റഷ്യയില്‍ നിന്നും കുറഞ്ഞ വിലക്ക് കൂടുതല്‍ എണ്ണ വാങ്ങാനുള്ള നീക്കങ്ങള്‍ വീണ്ടും സജീവമാക്കി ഇന്ത്യ. ബാരലിന് 70 ഡോളര്‍ നിരക്കില്‍ എണ്ണ വാങ്ങാനുള്ള നീക്കങ്ങള്‍ക്കാണ് ഇന്ത്യ തുടക്കം കുറിച്ചിരിക്കുന്നത്. ഇരു രാജ്യങ്ങളുടേയും ഉന്നത ഉദ്യോഗസ്ഥര്‍ ചര്‍ച്ചകള്‍ ആരംഭിച്ചുവെന്നാണ് റിപ്പോര്‍ട്ട്.
തൃക്കാക്കര ഉപതിരഞ്ഞെടുപ്പിലെ സ്ഥാനാർഥിയെ എൽഡിഎഫ് തീരുമാനിച്ചിട്ടില്ലെന്ന് എൽഡിഎഫ് കൺവീനർ ഇ പി ജയരാജൻ. എന്തടിസ്ഥാനത്തിലാണ് മാധ്യമങ്ങൾ തങ്ങൾ പ്രഖ്യാപിക്കാതെ സ്വന്തം നിലയ്ക്ക് സ്ഥാനാർഥിയെ പ്രഖ്യാപിച്ചതെന്നും അദ്ദേഹം ചോദിച്ചു.
ഹേമ കമ്മിറ്റി റിപ്പോർട്ട് പുറത്തുവിടാൻ സർക്കാർ തയ്യാറല്ലെന്ന് സ്ഥിരീകരിച്ച് സാംസ്കാരിക മന്ത്രി സജി ചെറിയാൻ. ഹേമ കമ്മിറ്റി റിപ്പോർട്ട് പുറത്തുവിടണമെന്ന് പറയുന്നതിന്റെ അടിസ്ഥാനമെന്താണെന്നും അദ്ദേഹം ചോദിച്ചു. പുറത്തുവിടരുതെന്ന് ഹേമ തന്നെ പറഞ്ഞിട്ടുണ്ടെന്നും മന്ത്രി സൂചിപ്പിച്ചു.
ഹേമ കമ്മിറ്റി റിപ്പോർട്ട് പുറത്ത് വിടുന്നതിൽ എതിർപ്പ് ഇല്ലെന്ന് താരസംഘടന അമ്മ. ഡബ്ല്യുസിസി ഹേമ കമ്മിറ്റി റിപ്പോർട്ടിലെ വിവരങ്ങൾ പുറത്തുവിടണമെന്ന് വീണ്ടും ആവശ്യപ്പെട്ടു. നിരാശാജനകമായിരുന്നു സിനിമാസംഘടനകൾ സർക്കാരുമായി നടത്തിയ ചർച്ചയെന്നും ഡബ്ല്യുസിസി പറഞ്ഞു.