കോവിഡ്-19 രോഗമുക്തി നേടിയവരിൽ പകുതിയിലധികം പേരും രണ്ട് വർഷം കഴിഞ്ഞിട്ടും ഒരു രോഗലക്ഷണമെങ്കിലും കാണിക്കുന്നതായി പഠനം. അന്താരാഷ്ട്ര മെഡിക്കൽ ജേണലായ ലാൻസെറ്റിലാണ് പഠനം പ്രസിദ്ധീകരിച്ചത്.രോഗമുക്തി നേടിയവരിൽ രോഗത്തിന്റെ സ്വാധീനം ദീർഘകാലം നിലനിൽക്കുമെന്ന് പഠനം വിശദീകരിക്കുന്നു.
പാകിസ്താൻ പ്രധാനമന്ത്രി ഷഹബാസ് ഷെരീഫ് തന്റെ മൂത്ത സഹോദരനും പാകിസ്താൻ മുസ്ലിം ലീഗ്-എൻ നേതാവുമായ നവാസ് ഷെരീഫുമായി ലണ്ടനിൽ കൂടിക്കാഴ്ച നടത്തി. ഷെഹ്ബാസിനെ കൂടാതെ പാർട്ടിയിലെ മറ്റ് മുതിർന്ന നേതാക്കളും മന്ത്രിസഭയിലെ അംഗങ്ങളും യോഗത്തിൽ പങ്കെടുത്തു.
മാവേലിക്കര ആത്മബോധോദയ സംഘം സംഘടിപ്പിച്ച പരിപാടിയിൽ ആരോഗ്യമന്ത്രി വീണാ ജോർജ് വേദി മാറിയെത്തി. മാവേലിക്കര കൊറ്റാർക്കാവ് പരിപാടിക്ക് പകരം ഗോവ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്ത ചെറുകോലിലെ പരിപാടിയിലേക്കാണ് മന്ത്രി വീണാ ജോർജിനെ പൊലീസ് സംഘം എത്തിച്ചത്.
കൊല്ലം കൊട്ടിയം തഴുത്തലയിൽ കിണറ്റിൽ കുടുങ്ങിയ തൊഴിലാളിയെ കണ്ടെത്തി. മുട്ടക്കാവ് സ്വദേശി സുധീറാണ് ഇന്നലെ ഉച്ചയോടെ കിണറ്റിനുള്ളിൽ കുടുങ്ങിയത്. ഇയാളുടെ ആരോഗ്യനില പരിശോധിച്ചു വരികയാണ്.കിണറ്റിൽ റിംഗ് ഇറക്കുന്നതിനിടെയുണ്ടായ അപകടത്തിൽ സുധീർ കിണറ്റിനുള്ളിൽ കുടുങ്ങുകയായിരുന്നു.
ചൈനയിലെ ചോങ്കിംഗ് വിമാനത്താവളത്തിലെ റൺവേയിൽ നിന്ന് തെന്നിമാറിയ ടിബറ്റ് എയർലൈൻസ് വിമാനത്തിന് തീപിടിച്ചു. യാത്രക്കാരെയും ജീവനക്കാരെയും സുരക്ഷിതമായി ഒഴിപ്പിച്ചതായി എയർലൈൻ പ്രസ്താവനയിൽ അറിയിച്ചു. 113 യാത്രക്കാരും ഒമ്പത് ജീവനക്കാരുമാണ് വിമാനത്തിലുണ്ടായിരുന്നത്.
തൃക്കാക്കരയിലെ എൽ.ഡി.എഫ് സ്ഥാനാർത്ഥി ഡോ.ജോ ജോസഫ് പെരുന്ന എൻ.എസ്.എസ് ആസ്ഥാനത്തെത്തി. എൻഎസ്എസ് ജനറൽ സെക്രട്ടറി സുകുമാരൻ നായരുമായി ജോ ജോസഫ് ചർച്ച നടത്തുകയാണ്. യു.ഡി.എഫ്, ബി.ജെ.പി സ്ഥാനാർത്ഥികൾ നേരത്തെ എൻ.എസ്.എസ് ആസ്ഥാനത്തെത്തി സുകുമാരൻ നായരെ കണ്ടിരുന്നു.
ചാരക്കേസിൽ ഇന്ത്യൻ വ്യോമസേന ഉദ്യോഗസ്ഥനെ ഡൽഹി ക്രൈംബ്രാഞ്ച് അറസ്റ്റ് ചെയ്തു. ഉത്തർപ്രദേശിലെ കാൺപൂർ സ്വദേശിയായ ദേവേന്ദ്ര ശർമ്മയെ തിങ്കളാഴ്ചയാണ് ക്രൈംബ്രാഞ്ച് കസ്റ്റഡിയിലെടുത്തത്. ഉദ്യോഗസ്ഥന്റെ ഭാര്യയുടെ ബാങ്ക് അക്കൗണ്ടിൽ സംശയാസ്പദമായ സാമ്പത്തിക ഇടപാടുകൾ നടന്നതായും പൊലീസ് കണ്ടെത്തിയിട്ടുണ്ട്.
‘സിൽവർ ലൈനിനെക്കുറിച്ച് അറിയേണ്ടതെല്ലാം’ എന്ന തലക്കെട്ടിൽ കൈപ്പുസ്തകം പുറത്തിറക്കാൻ സംസ്ഥാന സർക്കാരിന്റെ തീരുമാനം. അഞ്ച് ലക്ഷം കൈപ്പുസ്തകങ്ങൾ അച്ചടിക്കാൻ അനുമതി നൽകിയിട്ടുണ്ട്. പ്രിന്റിംഗ് ചാർജുകൾക്കും പേപ്പർ വിലയ്ക്കുമായി 7.5 ലക്ഷം രൂപ അനുവദിച്ചിട്ടുണ്ട്.
അപകീർത്തികരമായ വ്യാജവാർത്ത പ്രചരിപ്പിച്ചെന്നാരോപിച്ച് പയ്യന്നൂർ എം.എൽ.എ ടി.ഐ മധുസൂദനൻ ഏഷ്യാനെറ്റ് ന്യൂസിന് വക്കീൽ നോട്ടീസ് അയച്ചു. ഒരു കോടി രൂപ നഷ്ടപരിഹാരം നൽകണമെന്നാണ് അഭിഭാഷകൻ ആവശ്യപ്പെട്ടിരിക്കുന്നത്. അഡ്വ. കെ. വിജയകുമാർ മുഖേനയാണ് വക്കീൽ നോട്ടീസ് അയച്ചത്.
സർക്കാർ ജീവനക്കാർക്ക് ശമ്പളം നൽകാനാകാത്ത വിധം സംസ്ഥാനം കടുത്ത സാമ്പത്തിക പ്രതിസന്ധിയിലേക്ക് നീങ്ങുകയാണ്. കേന്ദ്രത്തിൽ നിന്ന് കടമായി ആവശ്യപ്പെട്ട 4,000 കോടി രൂപ നൽകാത്തതാണ് പ്രതിസന്ധി രൂക്ഷമാക്കിയത്. ശമ്പളത്തിന്റെ 10 ശതമാനം മാറ്റിവയ്ക്കാൻ ധനവകുപ്പിന് മുമ്പാകെ നിർദ്ദേശമുണ്ടെന്നാണ് വിവരം.