ആഗോള ഭക്ഷ്യ പ്രതിസന്ധി പരിഹരിക്കാൻ റഷ്യ സഹായിക്കുമെന്ന് പ്രസിഡൻറ് വ്ലാഡിമിർ പുടിൻ ഉറപ്പ് നൽകി. എന്നാൽ യുദ്ധത്തെത്തുടർന്ന് പാശ്ചാത്യ രാജ്യങ്ങൾ റഷ്യയ്ക്കെതിരായ ഉപരോധം പിൻവലിക്കണമെന്ന് പുടിൻ പറഞ്ഞു. ഇറ്റാലിയൻ പ്രധാനമന്ത്രി മരിയോ ഡ്രാഗിയുമായി നടത്തിയ ടെലിഫോണ് സംഭാഷണത്തിലാണ് പുടിൻ ഇക്കാര്യം വ്യക്തമാക്കിയത്.
“പാശ്ചാത്യ രാജ്യങ്ങൾ രാഷ്ട്രീയ പ്രേരിത നിയന്ത്രണങ്ങൾ നീക്കിയതോടെ, ഭക്ഷ്യ പ്രതിസന്ധി മറികടക്കാൻ ധാൻയങ്ങളുടെയും വളങ്ങളുടെയും കയറ്റുമതി ഗണ്യമായി വർദ്ധിപ്പിക്കാൻ റഷ്യൻ ഫെഡറേഷൻ തയ്യാറാണ്,” ക്രെംലിൻ പ്രസ്താവനയിൽ പറഞ്ഞു. അസോവ്, കരിങ്കടൽ തുറമുഖങ്ങളിൽ നിന്ന് സിവിലിയൻ കപ്പലുകൾക്ക് പുറത്തുകടക്കാൻ മാനുഷിക ഇടനാഴികൾ ദിവസേന തുറക്കുന്നത് ഉൾപ്പെടെയുള്ള കാര്യങ്ങളെക്കുറിച്ചും പുടിൻ സംസാരിച്ചു. ആഗോള വിപണിയിലെ ഭക്ഷ്യ വിതരണത്തിലെ പ്രശ്നങ്ങൾക്ക് ഉത്തരവാദി റഷ്യയാണെന്ന ആരോപണം അടിസ്ഥാന രഹിതമാണെന്ന് പുടിൻ പറഞ്ഞു.
“ഉക്രെയ്നിലെ ഡിപ്പോകളിലുള്ള ഗോതമ്പ് പുറത്തുവിടാൻ ഞങ്ങൾക്ക് എന്തെങ്കിലും ചെയ്യാൻ കഴിയുമോ എന്ന് ചോദിക്കുകയായിരുന്നു ഈ ടെലിഫോൺ കോളിൻറെ ഉദ്ദേശ്യം,” ഡ്രാഗി ഒരു പത്രസമ്മേളനത്തിൽ പറഞ്ഞു. കരിങ്കടൽ തുറമുഖങ്ങൾ തുറക്കാൻ റഷ്യയും ഉക്രൈനും സഹകരിക്കണം. നിലവിലെ സ്ഥിതി തുടർന്നാൽ ആർക്കും ഗുണം ചെയ്യാതെ ഉക്രൈനിലെ ഗോതമ്പ് അഴുകുമെന്നും അദ്ദേഹം പറഞ്ഞു. റഷ്യയുടെ ഭാഗത്ത് നിന്ന് അനുകൂലമായ തീരുമാനം എടുത്തിട്ടുണ്ടെന്നും ഈ വിഷയത്തിൽ ഉക്രൈൻറെ നിലപാട് അറിയാൻ പ്രസിഡൻറ് വോളോഡിമിർ സെലെൻസ്കിയുമായി ബന്ധപ്പെടുമെന്നും ഇറ്റാലിയൻ പ്രധാനമന്ത്രി കൂട്ടിച്ചേർത്തു.