പ്രദേശം വിട്ടുകൊടുക്കുന്ന സമാധാന ഉടമ്പടി അംഗീകരിക്കാനാവില്ലെന്ന് യുക്രൈൻ. നയതന്ത്രത്തിലൂടെ മാത്രമേ യുദ്ധം പരിഹരിക്കാനാകൂ എന്ന് യുക്രൈൻ പ്രസിഡന്റ് വോളോഡിമിർ സെലെൻസ്കി പറഞ്ഞതിനു തൊട്ടുപിന്നാലെയാണ് യുക്രൈന്റെ പുതിയ നിലപാട്. ഇളവുകൾ കൂടുതൽ വലുതും രക്തരൂക്ഷിതവുമായ റഷ്യൻ ആക്രമണത്തിലേക്ക് നയിക്കുമെന്ന് പ്രസിഡന്റ് ഉപദേഷ്ടാവ് പറഞ്ഞു.
കിഴക്കൻ മേഖലയിൽ സെവറോഡോനെറ്റ്സ്കിനെ പ്രതിരോധിക്കുന്ന യുക്രേനിയൻ സൈന്യത്തെ വളയാനുള്ള റഷ്യയുടെ ശ്രമങ്ങൾ തുടരുന്നതിനിടെയാണ് ഈ പരാമർശം. യുദ്ധത്തിൽ യുക്രേനിയൻ പ്രതിരോധം തകർക്കാനും രാജ്യത്തിന്റെ കിഴക്കൻ ലുഹാൻസ്ക് മേഖലയിലെ അഡ്മിനിസ്ട്രേറ്റീവ് അതിർത്തിയിലെത്താനും റഷ്യൻ സൈന്യം ഇപ്പോൾ ശ്രമിക്കുകയാണെന്ന് യുക്രേനിയൻ സായുധ സേന ജനറൽ സ്റ്റാഫ് പറഞ്ഞു. നാലു വ്യത്യസ്ത ദിശകളിൽ നിന്ന് സെവറോഡോനെറ്റ്സ്കിലേക്ക് കടക്കാൻ റഷ്യ ശ്രമിച്ചതായി ലുഹാൻസ്ക് റീജിയണൽ ഗവർണർ സെർഹി ഹൈദായി പറഞ്ഞു.
റഷ്യ ജനവാസ മേഖലകളിൽ ഷെല്ലാക്രമണം നടത്തുകയാണെന്നും ഈ ആക്രമണത്തിൽ നഗരത്തിനടുത്തുള്ള സിചാൻസ്കുമായി ബന്ധിപ്പിക്കുന്ന ഒരു പാലം തകർന്നുവെന്നും അദ്ദേഹം കൂട്ടിച്ചേർത്തു. അതേസമയം, പോളിഷ് പ്രസിഡൻറ് ആന്ദ്രെജ് ദുഡ കിവിൽ പാർലമെൻറിനെ നേരിട്ട് അഭിസംബോധന ചെയ്തു. “ഉക്രേനിയക്കാർക്ക് മാത്രമേ അവരുടെ ഭാവി തീരുമാനിക്കാൻ കഴിയൂ, ഉക്രെയ്നിനെ യൂറോപ്യൻ യൂണിയനിൽ ചേർക്കാൻ പോളണ്ട് സാധ്യമായതെല്ലാം ചെയ്യും,” അദ്ദേഹം കൂട്ടിച്ചേർത്തു. ഉക്രൈൻ യൂറോപ്യൻ യൂണിയൻ അംഗമായി അംഗീകരിക്കപ്പെടാൻ 15-20 വർഷമെടുക്കുമെന്ന് ഫ്രാൻസ് യൂറോപ്പ് മന്ത്രി ക്ലെമൻറ് ബ്യൂണ് ഞായറാഴ്ച ഒരു റേഡിയോ അഭിമുഖത്തിൽ പറഞ്ഞു.