സംസ്ഥാനത്ത് കനത്ത മഴ തുടരുന്നു. കനത്ത മഴയെ തുടർന്ന് കൊച്ചി നഗരത്തിലെ താഴ്ന്ന പ്രദേശങ്ങളും പ്രധാന റോഡുകളും ഉൾപ്പെടെ നിരവധി സ്ഥലങ്ങളിൽ വെള്ളം കയറി. പെരിങ്ങൽക്കുത്ത് ഡാമിലെ ജലനിരപ്പ് ഉയർന്നു. ഇവിടെ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ജലനിരപ്പ് ഒരു മീറ്റർ കൂടി ഉയർന്നാൽ ഡാം തുറക്കുമെന്ന് കളക്ടർ മുന്നറിയിപ്പ് നൽകി. വടക്കൻ തമിഴ്നാട്ടിലും സമീപ പ്രദേശങ്ങളിലും ചുഴലിക്കാറ്റ് സാന്നിധ്യമുള്ളതിനാലും ന്യൂനമർദ്ദം രൂപപ്പെട്ടതിനാലും കേരളത്തിൽ അതിശക്തമായ മഴ തുടരാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
കനത്ത മഴയെ തുടർന്ന് കൊച്ചി നഗരത്തിലെ താഴ്ന്ന പ്രദേശങ്ങളും പ്രധാന റോഡുകളും ഉൾപ്പെടെ നിരവധി സ്ഥലങ്ങളിൽ വെള്ളം കയറി. എം.ജി. റോഡ്, വളാഞ്ഞമ്പലം, പനമ്പിള്ളി നഗർ പ്രദേശങ്ങളിൽ വെള്ളം കയറി. വൈപ്പിൻ, ഞാറയ്ക്കൽ ഉൾപ്പെടെയുള്ള തീരപ്രദേശങ്ങളിൽ ഉൾനാടൻ പ്രദേശങ്ങളും വെള്ളത്തിനടിയിലാണ്. കോതമംഗലം ഉൾപ്പെടെയുള്ള മലയോര മേഖലകളിൽ മഴ തുടരുകയാണ്. എറണാകുളം ജില്ലയിൽ താലൂക്ക് അടിസ്ഥാനത്തിൽ തുറന്ന കൺട്രോൾ റൂമുകൾ പ്രവർത്തനം ആരംഭിച്ചു. ദുരന്തനിവാരണ സേനയുടെ രണ്ട് സംഘങ്ങൾ ക്യാമ്പ് ചെയ്യുന്നുണ്ട്.
കോട്ടയം ജില്ലയിലെ പാലാ, പൂഞ്ഞാർ പ്രദേശങ്ങളിലും കനത്ത മഴയാണ് പെയ്യുന്നത്. പൊയിൽക്കാവിൽ മരം വീണ് കോഴിക്കോട്-കണ്ണൂർ ദേശീയപാതയിൽ ഗതാഗതം തടസ്സപ്പെട്ടു. കൊയിലാണ്ടിയിൽ ആറര മണിക്കൂറോളം ഗതാഗതം തടസ്സപ്പെടുത്തിയ മരം മുറിച്ചുമാറ്റി. തിരുവനന്തപുരത്ത് കനത്ത മഴയും ആരംഭിച്ചിട്ടുണ്ട്.