വിദ്വേഷ പ്രസംഗക്കേസിൽ പി.സി ജോർജിന് ജാമ്യം നൽകിയതിനെതിരെ സർക്കാർ നാളെ അപ്പീൽ നൽകും. ജാമ്യം പിൻവലിക്കണമെന്നാവശ്യപ്പെട്ട് ജില്ലാ കോടതിയെ സമീപിക്കും. വിഷയത്തിൽ പോലീസ് നിയമോപദേശം തേടി. വർഗീയ പരാമർശം നടത്തിയെന്ന പരാതിയിൽ അറസ്റ്റിലായ മുൻ എംഎൽഎയ്ക്ക് മജിസ്ട്രേറ്റ് കോടതിയാണ് ജാമ്യം അനുവദിച്ചത്.
ഉപതിരഞ്ഞെടുപ്പ് നടക്കുന്ന തൃക്കാക്കരയിൽ സജീവമായി ഇടപെടുമെന്ന് സിൽവർ ലൈൻ വിരുദ്ധ സമിതി അറിയിച്ചു. സിൽവർലൈൻ വിരുദ്ധ ആശയങ്ങൾ മണ്ഡലത്തിലുടനീളം പ്രചരിപ്പിക്കാനാണ് പദ്ധതി. കൺവെൻഷനുകൾ ശനിയാഴ്ച ആരംഭിക്കും. ഒരു രാഷ്ട്രീയ പാർട്ടിക്കും പ്രത്യേക പിന്തുണ നൽകില്ലെന്ന് പ്രഖ്യാപിച്ചിട്ടുണ്ട്.
ആദ്യ കേരള ഗെയിംസിന്റെ ജലമത്സരങ്ങൾ നാളെ ആരംഭിക്കും. തിരുവനന്തപുരം പിരപ്പൻകോട് ബി ആർ അംബേദ്കർ ഇന്റർനാഷണൽ അക്വാട്ടിക്സ് കോംപ്ലക്സിലാണ് മത്സരങ്ങൾ നടക്കുക. പുരുഷന്മാരുടെയും സ്ത്രീകളുടെയും വാട്ടർ പോളോ പ്രിലിമിനറി റൗണ്ട് മത്സരങ്ങൾ നടക്കും.
യൂട്യൂബർ റിഫാ മെഹ്നുവിന്റെ ദുരൂഹ മരണവുമായി ബന്ധപ്പെട്ട് മൃതദേഹം പുറത്തെടുക്കാൻ അനുമതി. അന്വേഷണ സംഘത്തിന്റെ അഭ്യർത്ഥന പരിഗണിച്ചാണ് കോഴിക്കോട് ആർ.ഡി.ഒ ഇതിന് അനുമതി നൽകിയത്. ദുബായിൽ പോസ്റ്റ്മാർട്ടം നടത്തിയെന്ന് പറഞ്ഞ് ഭർത്താവ് മെഹ്നാസ് വഞ്ചിച്ചുവെന്ന് റിഫയുടെ കുടുംബം ആരോപിച്ചിരുന്നു.
തൃക്കാക്കരയിലെ യു.ഡി.എഫ് സ്ഥാനാർത്ഥി ഉമാ തോമസ് അങ്കമാലി അതിരൂപത ആർച്ച് ബിഷപ്പ് ആന്റണി കരിയിലുമായി കൂടിക്കാഴ്ച നടത്തി. എല്ലാവരോടും വോട്ട് ചോദിക്കുമെന്നും മറ്റ് സാമുദായിക നേതാക്കളെ കാണുമെന്നും ഉമാ തോമസ് പറഞ്ഞു.
അതിർത്തിയിൽ ഹിന്ദി ഭാഷ കൈകാര്യം ചെയ്യാൻ അറിയാവുന്നവരെ വിന്യസിക്കാൻ ചൈന ആലോചിക്കുന്നതായി റിപ്പോർട്ട്. പീപ്പിൾസ് ലിബറേഷൻ ആർമി (പിഎൽഎ) ചൈനയിലെ വിവിധ സർവകലാശാലകളിൽ പഠിച്ച ബിരുദധാരികളെ യഥാർത്ഥ നിയന്ത്രണ രേഖയിൽ (എൽഎസി) പരിഭാഷകരായി നിയമിക്കാൻ തയ്യാറെടുക്കുകയാണ്.
കാസർഗോഡ് മട്ടാലയിൽ സ്വകാര്യ ബസ് മറിഞ്ഞു. കാസർഗോഡ്-കണ്ണൂർ റൂട്ടിലോടുന്ന സ്വകാര്യ ബസാണ് അപകടത്തിൽപ്പെട്ടത്. സംഭവത്തിൽ നിരവധി യാത്രക്കാർക്ക് പരിക്കേറ്റു. ബസിന്റെ അമിത വേഗതയാണ് അപകടകാരണമെന്നാണ് പ്രാഥമിക നിഗമനം. ബസ് നിയന്ത്രണം വിട്ട് മറിയുകയായിരുന്നുവെന്ന് ദൃക്സാക്ഷികൾ പറഞ്ഞു.ആരുടെയും പരിക്ക് ഗുരുതരമല്ല.
കൊറോണ വൈറസ് (സാർസ്-കോവി-2) അണുബാധ വായുവിലൂടെ പടരുന്നതായി ഒരു കൂട്ടം ശാസ്ത്രജ്ഞർ സ്ഥിരീകരിച്ചു. ഹൈദരാബാദിലെയും മൊഹാലിയിലെയും ആശുപത്രികളിൽ നടത്തിയ സംയുക്ത പഠനത്തിലാണ് ഇക്കാര്യം സ്ഥിരീകരിച്ചത്. ഇതിനെ തുടർന്ന്, ഈ പഠനത്തിന്റെ ഫലങ്ങൾ ഇപ്പോൾ ജേണൽ ഓഫ് എയറോസോൾ സയൻസിൽ പ്രസിദ്ധീകരിച്ചിട്ടുണ്ട്.
വ്യവസായത്തിൽ വ്യക്തിമുദ്ര പതിപ്പിച്ച മീരാൻ കമ്പനികളുടെ ഗ്രൂപ്പിന്റെ ഭാഗമായ നന്മ പ്രോപ്പർട്ടീസ് ലിമിറ്റഡിന്റെ വൺ കൊച്ചി പദ്ധതിക്ക് തുടക്കമായി. സംസ്ഥാനത്തെ റിയൽ എസ്റ്റേറ്റ് മേഖലയിൽ നൂതനമായ മാറ്റങ്ങൾ വരുത്തുക എന്ന ലക്ഷ്യത്തോടെയാണ് കൊച്ചി വൈറ്റിലയിൽ പദ്ധതിക്ക് തുടക്കമിട്ടത്.
കാസർകോട്ടെ കൂൾബാറിലെ ഭക്ഷണ സാമ്പിളുകളിൽ ഇക്കോളി, കോളിഫോം ബാക്ടീരിയകളുടെ സാന്നിധ്യം കണ്ടെത്തി. ഭക്ഷ്യസുരക്ഷാ വിഭാഗം പരിശോധനയ്ക്ക് അയച്ച സാമ്പിളുകളിലാണ് സാന്നിധ്യം കണ്ടെത്തിയത്. കോഴിക്കോട് റീജിയണൽ അനലിറ്റിക്കൽ ലാബിലാണ് ഷവർമ, മയോണൈസ്, ഉപ്പിലട്ട, മസാലപ്പൊടികൾ എന്നിവ പരീക്ഷിച്ചത്.