എയർ ഇന്ത്യയുടെ മാനേജിംഗ് ഡയറക്ടറും സിഇഒയുമായി കാംപ്ബെല്‍ വില്‍സണിനെ ടാറ്റ സൺസ് നിയമിച്ചു. ഏവിയേഷൻ മേഖലയിൽ 26 വർഷത്തിലധികം പരിചയമുള്ള കാംപ്ബെല്‍ സിംഗപ്പൂർ എയർലൈൻസിൻറെ സബ്സിഡിയറിയായ സ്കൂട്ടിൻറെ സ്ഥാപക സിഇഒ ആണ്.
മുൻ ന്യൂസീലൻഡ് താരം ബ്രെൻഡൻ മക്കല്ലത്തെ ഇംഗ്ലണ്ട് ടെസ്റ്റ് ടീമിൻ്റെ മുഖ്യ പരിശീലകനായി നിയമിച്ചു. മക്കല്ലത്തിൻ്റെ കാലാവധി 4 വർഷമാണ്. ഐപിഎൽ ടീമായ കൊൽക്കത്ത നൈറ്റ് റൈഡേഴ്സിൻ്റെ പരിശീലകനായ മക്കല്ലം സീസണിൻ്റെ അവസാനത്തോടെ സ്ഥാനമൊഴിയും.
മെഗാസ്റ്റാര്‍ മമ്മൂട്ടിയും പാര്‍വതി തിരുവോത്തും കേന്ദ്രകഥാപാത്രങ്ങളായി എത്തുന്ന ചിത്രം ‘പുഴു’ സോണിലൈവിലൂടെ ഒടിടി റിലീസായി എത്തി. നാളെ മുതല്‍ ചിത്രം സ്ട്രീമിംഗിന് ലഭ്യമാക്കുമെന്നായിരുന്നു പ്രഖ്യാപനമെങ്കിലും മണിക്കൂറുകള്‍ക്കു മുമ്പ് ചിത്രം ഉപയോക്താക്കള്‍ക്ക് ലഭ്യമായി.
സർക്കാർ ജീവനക്കാരുടെ ശമ്പള വിതരണത്തിൽ പ്രതിസന്ധിയില്ലെന്ന് ധനമന്ത്രി കെ.എൻ ബാലഗോപാൽ. അടുത്ത മാസത്തെ ശമ്പളത്തിൻറെ 10% തടഞ്ഞുവയ്ക്കുമെന്ന വാർത്ത അടിസ്ഥാന രഹിതമാണ്. തൃക്കാക്കര ഉപതിരഞ്ഞെടുപ്പിന് മുന്നോടിയായി ആശങ്ക സൃഷ്ടിക്കാനുള്ള നുണപ്രചാരണമാണിതെന്നും മന്ത്രി പറഞ്ഞു.
കേരളത്തിൽ മാത്രം നിലവിൽ 41 രാജ്യദ്രോഹ കേസുകൾ ഉണ്ടെന്ന് റിപ്പോർട്ടുകൾ. ഇതിൽ 40ഓളം കേസുകളിൽ മറ്റ് വകുപ്പുകൾക്ക് ഒപ്പമാണ് രാജ്യദ്രോഹക്കുറ്റം ചുമത്തിയിട്ടുള്ളത്. മാവോയിസ്റ്റുകളുടെ സാന്നിധ്യമുള്ള വടക്കൻ ജില്ലകളിലാണ് ഏറ്റവും കൂടുതൽ രാജ്യദ്രോഹക്കുറ്റങ്ങൾ റിപ്പോർട്ട് ചെയ്തിരിക്കുന്നത്.
രാജ്യത്തിൻറെ പല ഭാഗങ്ങളിലും അനിയന്ത്രിതമായ ഉഷ്ണതരംഗം നിലനിൽക്കുന്ന സാഹചര്യത്തിൽ സ്കൂളുകൾക്ക് മാർഗനിർദേശങ്ങൾ പുറപ്പെടുവിച്ചു. യൂണിഫോമിൽ ഇളവ് വരുത്താനും ക്ലാസ് സമയം രാവിലെ 7 മുതലാക്കാനും നിർദ്ദേശമുണ്ട്. കുടിവെള്ളം, ഉച്ചഭക്ഷണ സൗകര്യങ്ങൾ എന്നിവ അധികൃതർ ഉറപ്പാക്കണമെന്നും നിർദ്ദേശങ്ങളിൽ പറയുന്നു.
തൃക്കാക്കര ഉപതിരഞ്ഞെടുപ്പിൽ മത്സരിക്കുന്നത് എട്ട് സ്ഥാനാർത്ഥികൾ. നാമനിർദ്ദേശ പത്രികകളുടെ സൂക്ഷ്മപരിശോധന പൂർത്തിയായപ്പോൾ എട്ട് സ്ഥാനാർത്ഥികളാണ് അന്തിമ പട്ടികയിലുണ്ടായിരുന്നത്. 18 നാമനിർദ്ദേശ പത്രികകളിൽ 10 എണ്ണം നിരസിച്ചു.
രാജ്യസഭയിൽ ഒഴിവുള്ള സീറ്റുകളിലേക്കുള്ള തിരഞ്ഞെടുപ്പ് തീയതികൾ തിരഞ്ഞെടുപ്പ് കമ്മീഷൻ പ്രഖ്യാപിച്ചു. 15 സംസ്ഥാനങ്ങളിലെ 57 രാജ്യസഭാ സീറ്റുകളിലേക്കുള്ള തിരഞ്ഞെടുപ്പ് തീയതികൾ പ്രഖ്യാപിച്ചു. തിരഞ്ഞെടുപ്പ് വിജ്ഞാപനം മെയ് 24ന് പുറപ്പെടുവിക്കും. വോട്ടെടുപ്പും വോട്ടെണ്ണലും ജൂൺ 10ന് നടക്കും.
ഉക്രേനിയൻ വിംഗർ ആൻഡ്രി യാർമോലെങ്കോ വെസ്റ്റ് ഹാം വിടാനൊരുങ്ങുന്നു. ജൂണിൽ കരാർ കാലാവധി അവസാനിക്കുമ്പോൾ യാർമോലെങ്കോ വെസ്റ്റ് ഹാം വിടും. 2018ലാണ് യാർമോലെങ്കോ ഡോർട്ട്മുണ്ടിൽ നിന്ന് വെസ്റ്റ് ഹാമിലേക്ക് മാറിയത്. 18 മില്യൺ ഡോളറാണ് അന്ന് വെസ്റ്റ് ഹാം താരത്തിനായി ചെലവഴിച്ചത്.
മദ്രസകൾ ക്ലാസുകൾ ആരംഭിക്കുന്നതിന് മുമ്പ് ദേശീയഗാനം ആലപിക്കണമെന്ന് ഉത്തർപ്രദേശ് സർക്കാർ. ക്ലാസുകൾ ആരംഭിക്കുന്നതിന് മുമ്പ് എല്ലാ വിദ്യാർത്ഥികളും അധ്യാപകരും ദേശീയഗാനം ആലപിക്കണമെന്നാണ് ഉത്തരവ്. ഉത്തർപ്രദേശ് ന്യൂനപക്ഷകാര്യ മന്ത്രി ഡാനിഷ് ആസാദ് അൻസാരിയാണ് ഉത്തരവ് പുറപ്പെടുവിച്ചത്.