സർക്കാർ ആശുപത്രികളിൽ ആഴ്ചയിൽ ഒരു ദിവസം കാൻസർ പ്രാരംഭ സ്ക്രീനിംഗ് ക്ലിനിക്കുകൾ ആരംഭിക്കുമെന്ന് മുഖ്യമന്ത്രി പിണറായി വിജയൻ. കാൻസർ സെന്ററുകൾ, മെഡിക്കൽ കോളേജുകൾ, ജില്ലാ, ജനറൽ താലൂക്ക് ആശുപത്രികൾ എന്നിവ ഉൾപ്പെടുത്തി കാൻസർ കെയർ ഗ്രിഡ് രൂപീകരിച്ച് ചികിത്സ വികേന്ദ്രീകരിക്കാനാണ് സർക്കാർ ആലോചിക്കുന്നത്. കാൻസർ ബോധവൽക്കരണ പരിപാടികൾ, ഗൃഹസന്ദർശനങ്ങൾ, വിവരശേഖരണം എന്നിവയും ഇതിന്റെ ഭാഗമാകുമെന്നും മുഖ്യമന്ത്രി പറഞ്ഞു.
നവകേരളം ആക്ഷൻ പ്ലാൻ രണ്ടിന്റെ ഭാഗമായ ആർദ്രം മിഷന്റെ രണ്ടാംഘട്ട ഉദ്ഘാടനം നിർവഹിച്ച് സംസാരിക്കുകയായിരുന്നു മുഖ്യമന്ത്രി. ഒരു ആരോഗ്യ, വാർഷിക ആരോഗ്യ പരിശോധനാ പദ്ധതി, കാൻസർ നിയന്ത്രണ പദ്ധതി എന്നിവയും അദ്ദേഹം ഉദ്ഘാടനം ചെയ്തു. ആരോഗ്യമേഖലയിൽ ഡിജിറ്റൽ സാങ്കേതികവിദ്യ ഉപയോഗിക്കുന്നതിൽ കേരളം മുൻപന്തിയിലാണ്. ആരോഗ്യമേഖലയിൽ വിവരസാങ്കേതിക വിദ്യയും ആശയവിനിമയ സാങ്കേതികവിദ്യയും പ്രയോജനപ്പെടുത്തുകയാണ് ഇ-കേരള ഡിജിറ്റൽ ഹെൽത്ത് മിഷന്റെ ലക്ഷ്യം.
30 വയസിന് മുകളിലുള്ള എല്ലാ വ്യക്തികളുടെയും ജീവിതശൈലീ രോഗങ്ങളെക്കുറിച്ചും അതിലേക്ക് നയിക്കുന്ന കാരണങ്ങളെക്കുറിച്ചും വിവരങ്ങൾ ശേഖരിക്കാൻ ആശാ വർക്കർമാരെ ഈ പദ്ധതിയിലൂടെ ചുമതലപ്പെടുത്തി. ആദ്യഘട്ടത്തിൽ ഓരോ നിയോജകമണ്ഡലത്തിലെയും പ്രാഥമികാരോഗ്യ കേന്ദ്രത്തിലായിരിക്കും പദ്ധതി നടപ്പാക്കുക. അതിനുശേഷം ഘട്ടം ഘട്ടമായി എല്ലാ പഞ്ചായത്തുകളിലേക്കും വ്യാപിപ്പിക്കും.