നടിയെ ആക്രമിച്ച കേസിൽ ദുബായിൽ ഒളിവിൽ കഴിഞ്ഞിരുന്ന നടനും നിർമ്മാതാവുമായ വിജയ് ബാബു ജോർജിയയിലേക്ക് ഒളിച്ചോടിയതായി റിപ്പോർട്ട്. ഒളിച്ചോടിയവരെ കൈമാറുന്നതിന് ജോർജിയയ്ക്ക് ഇന്ത്യയുമായി ഒരു ഉടമ്പടിയുമില്ല. ഇത് മനസ്സിലാക്കിയാണ് ഇയാൾ ജോർജിയയിലേക്ക് പോയതെന്നാണ് വിവരം.
കൊച്ചി സിറ്റി പൊലീസ് സമർപ്പിച്ച റിപ്പോർട്ടിൻറെ അടിസ്ഥാനത്തിലാണ് വിജയ് ബാബുവിൻറെ പാസ്പോർട്ട് വിദേശകാര്യ മന്ത്രാലയം റദ്ദാക്കിയത്. ഇതോടെ വിജയ് ബാബുവിൻറെ വിസയും റദ്ദാക്കും. ഇത് മുൻകൂട്ടി അറിഞ്ഞാണ് ഇയാൾ ജോർജിയയിൽ പ്രവേശിച്ചതെന്നാണ് വിവരം. പാസ്പോർട്ട് റദ്ദാക്കിയ ശേഷം ഇൻറർപോളിൻറെ സഹായത്തോടെ വിജയ് ബാബുവിനെ അറസ്റ്റ് ചെയ്ത് നാട്ടിലെത്തിക്കാൻ പൊലീസ് ശ്രമിച്ചു.
വിജയ് ബാബു മറ്റൊരു രാജ്യത്തേക്ക് കടന്നതായി സൂചനയുണ്ടെന്ന് കൊച്ചി സിറ്റി പൊലീസ് കമ്മീഷണർ സി എച്ച് നാഗരാജു നേരത്തെ അറിയിച്ചിരുന്നു. മെയ് 24 നകം ഹാജരാകാത്ത പക്ഷം റെഡ് കോർണർ നോട്ടീസ് പുറപ്പെടുവിക്കുമെന്ന് കമ്മീഷണർ അറിയിച്ചു.